შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი საკადრო ცვლილებებში უჩვეულოს ვერაფერს ხედავს.
Mმინისტრი დარწმუნებულია, რომ პრემიერის გადაწყვეტილება საკადრო ცვლილებებთან დაკავშირებით, არსებული მდგომარეობის შესაბამისია.
"ეს არის პრემიერ-მინისტრის გადაწყვეტილება და მე დარწმუნებული ვარ, რომ მისი გადაწყვეტილება შეესაბამება ამ დროისთვის არსებულ ვითარებას. საკადრო პოლიტიკის ცვლილება მთელ მსოფლიოში ჩვეულებრივი ამბავია, ნახეთ ახლა ობამამ შეცვალა გარკვეული მინისტრები, მადლობა ღმერთს რომ ჩვენთან არ არის ჩაცემენტებული ხელისუფლება და არ გვეშინია ცვლილებების", - განაცხადა ჟურნალისტებთან ზაქარეიშვილმა.
შეგახსენებთ, რომ პრემიერმა მორიგი საკადრო ცვლილებები განახორციელა.
,,ჩვენ დავასრულეთ შიდაუწყებრივი გადაადგილებები. ბატონი გიორგი ზედელაშვილი, რომელიც იყო შს მინისტრის მოადგილე, დაინიშნა უსაფრთხოებისა და კრიზისების მართვის საბჭოს მდივნის მოადგილედ. ჩვენ მივიღეთ კანონი უსაფრთხოებისა და კრიზისების მართვის საბჭოს შესახებ და გვაქვს სურვილი, მაქსიმალურად გავაძლიეროთ ეს უწყება. როგორც გუშინ ვაცნობე საზოგადოებას, ვიწყებთ შს სამინისტროს რეფორმირებას, უსაფრთხოების სამსახურის გამოყოფას შინაგან საქმეთა სამინისტროსგან. ვფიქრობ, განხორციელებული საკადრო ცვლილებები ამ პროცესს დაეხმარება. ბატონი ვახტანგ გომელაური დაინიშნება შს მინისტრის პირველ მოადგილედ, ასევე მინისტრის მოადგილედ ინიშნება თეიმურაზ მღებრიშვილი, რომელიც იყო სახელმწიფო დაცვის სპეციალური სამსახურის უფროსი. ანზორ ჩუბინიძე კი დავაბრუნეთ სახელმწიფო დაცვის სამსახურის უფროსად. კიდევ ერთი ცვლილება გახლავთ ის, რომ სასჯელაღსრულების მინისტრის მოადგილე არჩილ თალაკვაძე დაინიშნება შს მინისტრის მოადგილედ. ეს არის ის ცვლილებები, რომელიც განვახორციელეთ გუშინ,"- აღნიშნა ირაკლი ღარიბაშვილმა.
