,,ნაცმოძრაობის" დეპუტატი გიგი წერეთელი ეუთოს საპარლამენტო ასამბლეის სპეცწარმომადგენლის სამხრეთ კავკასიაში ჟოაო სუარეშის განცხადებას ეხმიანება და განმარტავს, რომ ხელისუფლებამ თუ არ გაითვალისწინა მსგავსი ხასიათის განმარტებები და პოლიტიკა არ შეცვალა ქვეყანა ცუდ შედეგს მიიღებს.
,,ჟოაო სუარესი წერილში კრიტიკულად აღნიშნავს იმ პოლიტიკურ ბუნებას, რომელიც საქართველოში მიმდინარეობს. ის შეშფოთებას გამოხატავს იმასთან დაკავშირებით, რომ საქართველოში ხელისუფლების ასეთი მოქმედება დემოკრატიას უკან ხევს, რაც მიმდინარე პროცესებზე ნეგატიურად მოქმედებს. სუარესი უარყოფითად არის განწყობილი ყოფილი პრეზიდენტის, მიხეილ სააკაშვილის მიმართ განხორციელებული პროცესებისადმი. მთავრობამ თუკი ასეთი განცხადებები არ გაითვალისწინა და არ შეცვალა პოლიტიკა, ჩვენ გვექნება ძალიან ცუდი შედეგები", - განაცხადა ჟურნალისტებთან წერეთელმა საუბარში.
ეუთოს საპარლამენტო ასამბლეის სპეცწარმომადგენელი სამხრეთ კავკასიაში ჟოაო სუარეში შეშფოთებას გამოთქვამს საქართველოში სასამართლო სისტემის პოლიტიკური მიზნით გამოყენების შესახებ გავრცელებული ცნობების გამო.
ჟოაო სუარეში პარლამენტის თავმჯდომარე დავით უსუფაშვილს სპეციალური წერილით მიმართვას, სადაც მითითებულია, რომ საერათშორისო გაერთიანება, მათ შორის ეუთოს წევრი არაერთი ქვეყანა გამოხატავს შეშფოთებას საქართველოში სასამართლო პროცესების არაობიექტურად წარმართვისა და იმ ფაქტის მიმართ, რომ ოპოზიციის ლიდერთა ნაწილი უკვე ციხეშია, ან მის წინააღმდეგ გამოძიება მიმდინარეობს.
"მე ყურადღებით და შეშფოთებით ვადევნებ თვალს საქართველოში მიმდინარე პროცესებს, მომდის ინფორმაცია მართლმსაჯულების სისტემის პოლიტიკური მიზნით არამართლზომიერი გამოყენების შესახებ. არაერთი საერთაშორისო აქტორი, მათ შორის OSCE/ODHIR-ი და ეუთოს წევრი არაერთი რამდენიმე ქვეყანა გამოხატავს შეშფოთებას სასამართლო პროცესების სამართლიანობის თაობაზე და აგრეთვე იმის გამო, რომ ოპოზიციის ნაწილი ან უკვე ციხეშია (ძირითადად წინასწარ პატიმრობაში), ან ბრალდების/გამოძიების ქვეშაა" - აცხადებს სოარესი და აღნიშვას, რომ მსგავსი ინფორმაციის გავრცელება ჩრდილს აყენებს საქართველოში ბოლო პერიოდში მიღწეულ პროგრესს.
"მსგავსი ცნობები ჩრდილს აყენებს დემოკრატიული და ინსტიტუციონალური განვითარების კუთხით ბოლო წლებში მიღწეულ პროგრესს. 2012 წლის არჩევნების შემდეგ ხელისუფლების მშვიდობიანი და სამაგალითო გადაბარება საქართველოს დემოკრატიული განვითარების დემონსტრირება იყო. მთავრობამ უნდა უზრუნველყოს, რომ ქვეყანა დემოკრატიული კონსოლიდაციის მიმართულებით წავიდეს და არა უკან," - წერს ჟოაო სუარეში.
ეუთოს საპარლამენტო ასამბლეის სპეცწარმომადგენელი ასევე აღნიშნავს, რომ განსაკუთრებით აღელვებს ექსპრეზიდენტ მიხეილ სააკაშვილისთვის წინასწარი პატიმრობის შეფარდება და მისი ოჯახის წევრთა ქონების დაყადაღება, რასაც მის ბრალეულობასთან არანაირი კავშირი არ აქვს.
"მიუხედავად იმისა, რომ კანონზე მაღლა არავინ დგას, ამ და სხვა გამოძიებების პოლიტიკური ხასიათი ანადგურებს თქვენი ხელისუფლების მტკიცებას იმის თაობაზე, რომ კანონის უზენაესობა დაცულია," - წერს სუარეში.