განათლებისა და მეცნიერების მინისტრის თამარ სანიკიძის განცხადებით, საქართველოს ყოფილი მაღალჩინოსნების უკრაინულ მთავრობაში დანიშვნა ორ ქვეყანას შორის ურთიერთობასდაღს არ დასვამს, თუმცა როგორც მთავრობის სხდომის შემდეგ მინისტრმა განმარტა აღნიშნული საკითხი გადახედვას საჭიროებს.
,,რაც შეხება უკრაინასთან შემდგომ ურთიერთობას, არა მგონია, ამ ფაქტმა დარი დაასვას ამ ურთიერთობას, თუმცა ნამდვილად არასასიამოვნო მომენტია და გადახედვას, ალბათ, საჭიროებს", _განაცხადა სანიკიძემ.
შეგახსენებთ, რომ უკრაინის პრეზიდენტ პეტრე პოროშენკოს ფრაქციის წევრმა მუსტაფა ნაიემმა სოციალური ქსელ "ფეისბუქში" დაადასტურა, რომ უკრაინის შინაგან საქმეთა მინისტრის მოადგილის პოსტზე ეკა ზღულაძის კანდიდატურა განიხილება. ზღულაძე საქართველოს შინაგან საქმეთა მინისტრი იყო მიხეილ სააკაშვილის მთავრობაში.
სოციალურ ქსელში გამოქვეყნდა ფოტოები, სადაც ალექსანდრე კვიტაშვილი ყოფილ შინაგან საქმეთა მინისტრ ეკა ზღულაძესთან ერთად მმართველი პარტიის ფრაქციის წევრებს ხვდება. უკრაინული მედიის ინფორმაციით, ფრაქციასთან შეხვედრაზე გუშინ თავად პრეზიდენტი პოროშენკოც იმყოფებოდა.
უკრაინულ მედიაში გუშინ გავრცელდა ინფორმაცია, რომ საქართველოს ყოფილი ჯანდაცვის მინისტრი ალექსანდრე კვიტაშვილი პეტრე პოროშენკომ უკრაინაში ჯანდაცვის მინისტრის პოსტზე წარადგინა. კვიტაშვილი, სავარაუდოდ, უკრაინის ხელისუფლების მიერ შეთავაზებულ წინადადებას დათანხმდა.