,,ერთიანი ნაციონალური მოძრაობა" მთავრობას რუსეთის მიერ აფხაზეთის მიმდინარე ანექსიის ფონზე უმოქმედობაში ადანაშაულებს. პარტიის ოფისში დღეს გამართულ ბრიფინგზე დეპუტატმა გიორგი კანდელაკმა განაცხადა რომ საქარეო საქმეთა სამინისტროს გაეროსთან საქართველოს მისიისთვის უშიშროების საბჭოს სხდომის მოწვევა ჯერაც არ დაუვალებია.
,,ნაციონალური მოძრაობა" სამინისტროსგან განმარტებების გაკეთებას მოითხოვს თუ რატომ ჭიანურდება შესაბამისი დავალების გაცემა.
,,ჩვენი ინფორმაციით, საგარეო საქმეთა სამინისტროს მაშინ როცა მიმდინარეობს აფხაზეთის ანექსია, დაპირების მიუხედავად ჯერაც არ დაუვალებია გაეროში საქართველოს მისიისთვის გაეროს უშიშროების საბჭოს სხდომის მოსაწვევად შესაბამისი პროცედურების დაწყება. Dღესის მდგომარეობით ასეთი დავალება თბილისიდან წასული არ არის. აუცილებელია საგარეო საქმეთა სამინისტრომ გააკეთოს განმარტება რატომ არ ავალებს მისიას გაეროს უშიშროების საბჭოს მოწვევას", _განაცხადა კანდელაკმა.
მისივე განცხადებით, საგარეო საქმეთა სამინისტრომ უნდა გააკეთოს განმარტება უშიშროების საბჭოს სხდომის მოწვევა ჭიანურდება თუ არა საქართველოს მთავრობისა და პრემიერის დავალებით.
შეგახსენებთ, რომ 28 ნოემბერს გამართული მთავარობის სხდომის შემდეგ საგარეო საქმეთა მინისტრმა თამარ ბერუჩაშვილმა განმარტა, რომ, რუსეთსა და დე-ფაქტო აფხაზეთს შორის გაფორმებულ ე.წ. ,,მოკავშირეობისა და სტრატეგიული პარტნიორობის ხელშეკრულებასთან" დაკავშირებით გაეროს უშიშროების საბჭოს სხდომის მოწვევაზე აქტიური კონსულტაციები მიმდინარეობს.
,,გაეროს უშიშროების საბჭოს სხდომის მოწვევაზე ვმუშაობთ. კონსულტაციები მიდის, როგორც გაეროს მუდმივ წევრებთან, ასევე არამუდმივ წევრებთან. ჩვენი საელჩოც ჩართულია, ადგილზე მიდის კონსულტაციები ნიუ-ორკში. გვაქვს შეხვედრა ელჩებთან, სამუშაო პროცესია და იმედია მივიღებთ კონკრეტულ შედეგს. ვემზადებით, ყველა სამინისტრო ჩართულია, რადგან ამ საკითხის მომზადებას სჭირდება სერიოზული პოლიტიკური და ასევე სამართლებრივი შეფასება", _განაცხადა ბერუჩაშვილმა მთავრობსის სხდომის შემდეგ.
