"საქართველოს ადვოკატთა ასოციაციის" თავმჯდომარე, ზაზა ხატიაშვილი ყოფილ პრემიერმინისტრ, ბიძინა ივანიშვილს ღია წერილით მიმართავს და 10 მოთხოვნას უყენებს. ღია წერილს გთავაზობთ უცვლელად:
"ჩვენო ახალო შუქურა, ამ წერილის მოწერა გადამაწყვეტინა ორმა გარემოებამ. პოლიციის სურნელით გაჟღენთილი პარლამენტის ვაიდეპუტატების მხრიდან თქვენი პოზიციის გაზიარებამ და უკანონო მოსმენების დაკანონებამ. იმისათვის, რომ საქართველოს მოსახლეობას მოუსმინოთ, თვით მარიკა ვერულაშვილთან წახვედით ალიანსზე, ყველაზე მგზნებარე "ნაციონალთან". ეს იმაზე მიუთითებს, რომ თქვენ ყველაფერზე წამსვლელი ადამიანი ბრძანდებით ოღონდ შეინარჩუნოთ ხელისუფლება. მეორე და ყველაზე მნიშვნელოვანია გირგვლიანის მკვლელობის საქმეზე პროკურატურამ ბრალი წაუყენა სააკაშვილს და აღნიშნა, სააკაშვილმა თანამდებობა გამოიყენა ბოროტად და დაფარა დანაშაულიო, ეს მე ძალიან მომეწონა, ვინაიდან საქართველოში უნდა დამთავრდეს თანამდებობის პირების ხელშეუხებლობა. აღნიშნული პრეცედენტი დააფიქრებს იმ პირებს რომლის მწამებლებს და მკვლელებს მფარველობენ. მინდა გითხრათ, რომ პროკურატურამ კარგი საქმე გააკეთა, როდესაც ხელისუფლება შეიცვლება აღნიშნული პრეცედენტის გამოყენებით ბრალს თქვენ და ღარიბაშვილსაც წაგიყენებენ რევაზ დვალიშვილის წამების საქმის დაფარვის გამო. თქვენს და ღარიბაშვილის ქმედებებს გამოძიებაც არ ჭირდება. ჩვენო ახალო შუქურა, ჯორჯ ბუშმა სააკაშვილს დემოკრატიის შუქურა უწოდა, სააკაშვილმა იფიქრა მართლა შუქურა ვარო და დააქცია ქვეყანა. 2012 წლის 1 ოქტომბრის არჩევნების შემდეგ თქვენ ხალხმა ქვეყნის იმედად და ახალ შუქურად მოგნათლათ, თქვენც იფიქრეთ მესია ვარო და აგრძელებთ ქვეყნის დანგრევის პროცესს.
ერთი წელია თქვენთვის ღია წერილით არ მომიმართავს, მაგრამ ქვეყანაში შექმნილი კატასტროფული მდგომარეობა მაიძულებს კიდევ ერთხელ მოგმართოთ. ერთი წლის წინ გწერდით, რომ ქვეყანა მიგყავდათ ფეოდალიზმისკენ, მაგრამ არ დამიჯერეთ შედეგი სამწუხაროდ სახეზეა, ახლა მაინც თუ არ მოეგებით გონს ყველაფერი შეიძლება ამოვარდეს კონტროლიდან და მოვლენებმა შეიძლება შეუქცევადი ხასიათი მიიღოს.
ჩვენო ახალო შუქურა, სააკაშვილის რეჟიმის დამარცხების შემდეგ თქვენ თითქმის მთელი საქართველო იმედის თვალით შემოგყურებდით, მაგრამ თქვენი მმართველობის პერიოდში ისეთი საშინელებები ჩაიდინეთ, მოვა დრო და პასუხის გაცემა მოგიწევთ ქართველი ხალხის წინაშე. როგორც სააკაშვილი ვერ ჩამოდის საქართველოში, მოვა დრო და თქვენც სანატრელი გექნებათ საკუთარ ქვეყანაში ჩამოსვლა. მე მინდა თავდაპირველად ყურადღება გავამახვილო თქვენს მიერ ჩადენილ ისეთ მოქმედებებზე, რომლებიც სავარაუდოდ შეიცავენ სისხლის სამართლის დანაშაულის ნიშნებს.
1. ყველა ჭკუათმყოფელი გირჩევდათ, რომ არ დაგენიშნათ 31 წლის ირაკლი ღარიბაშვილი პრემიერ-მინისტრად, მაგრამ არავის არ მოუსმინეთ, შედეგი სახეზეა. ღარიბაშვილის მთავრობამ ქვეყანაში აღადგინა ტოტალური კორუფცია, მიმდინარეობს ძალადობა სამოქალაქო სექტორზე, პოლიციაში ნარკოტიკების ჩადების პროცესმა უდანაშაულო მოქალაქეებზე მიიღო შეუქცევადი ხასიათი, საპატიმრო დაწესებულებებში თითქმის არაფერი არ შეიცვალა, გარდა იმისა, რომ ჯერჯერობით არავის არ აუპატიურებენ, საპატიმროებში პოლიციური ძალადობა ჩაანაცვლა ანარქიულმა ძალადობრივმა პროცესებმა, ქვეყანა იღებს საგარეო ვალებს იმიტომ, რომ დაფაროს ჩინოვნიკების საპრემიო მადა, ვისაც გვაქვს განსხვავებული მოსაზრებები და შეხედულებები ვიდევნებით, ხელისუფლების მიერ დაქირავებული ხალხი, გვეძახის ნაციონალებს, ქვეყნის მოღალატეებს და ასე შემდეგ. ასე რომ, ჩემო შუქურა ქვეყანა მიდის ჭაობისკენ.
2012 წლის 18 დეკემბერს გამოვიდა ევროპის ადამიანის უფლებათა სასამართლოს გადაწყვეტილება ,,დვალიშვილი- საქართველოს წინააღმდეგ", ადამიანის უფლებათა კონვენციის 3 მუხლის (წამება არაადამიანური არაჰუმანური მოპყრობა) დარღვევის გამო. მინდა მოგახსენოთ, რომ სტრასბურგში ეს საქმე მე მოვუგე სააკაშვილის ხელისუფლებას. ვალიშვილი 2006 წლიდან ამბობდა, რომ წყალტუბოს პოლიციაში, როდესაც იგი აწამა რევაზ ქობულიამ სხვა პოლიციელებთან ერთად მას წაავლო ფეხებში ხელი დაასხა იატაკზე კოკა-კოლა და ენით აალოკინა. რევაზ დვალიშვილი რამოდენიმე თვე მკურნალობდა და ძლივს გადარჩა ცოცხალი. მე მივმართე არჩილ კბილაშვილს და მოვითხოვე დამნაშავეების დასჯა. სტრასბურგის სასამართლო გადაწყვეტილების შემდეგ 7 თვის მანძილზე, ნაცვლად იმისა, რომ რევაზ ქობულიას დაკისრებოდა პასუხისმგებლობა ირაკლი ღარიბაშვილმა რევაზ ქობულია დანიშნა წყალტუბოს პოლიციის სამმართველოს უფროსად, როგორც მე წყალტუბოში მითხრეს ბატონმა თამაზაშვილმა გაუწია რეკომენდაცია. მინდა გკითხოთ, რა მნიშვნელობა აქვს კანონისთვის, გირგვლიანის მკვლელებს დანაშაულს დაფარავ თუ დვალიშვილის მწამებლებს გადაეფარები, როგორც გირგვლიანის საქმეში ევროპის ადამიანის უფლებათა სასამართლომ საკართველოს ასევე დაავალა დვალიშვილის წამების ფაქტის გამოძიება.
მე თქვენ 2013 წლის აგვისტოში მოგმართეთ და მოგთხოვეთ ირაკლი ღარიბაშვილის შინაგან საქმეთა მინისტრობიდან გათავისუფლება, ამასთან წარმოგიდგინეთ ევროპის ადამიანის უფლებათა სასამართლოს გადაწყვეტილება დვალიშვილის წამების ფაქტზე, თქვენ ნაცვლად იმისა, რომ გაგეთავისუფლებინათ ირაკლი ღარიბაშვილი, ჩემი მომართვიდან 3 თვეში ირაკლი ღარიბაშვილი პრემიერ-მინისტრად დანიშნეთ. თქვენ და ღარიბაშვილმა ქვეყანაში დააკანონეთ გირგვლიანი 2. სააკაშვილი გადაყვა გირგვლიანის საქმეს, რომელზეც მის მაღალჩინოსნებს ბრალი წარედგინათ, თქვენ და ღარიბაშვილი გადაყვებით დვალიშვილის წამების საქმეს. ბაჩო ახალაიას მიესაჯა გირგვლიანის მკვლელების ციხიდან გასეირნების გამო 6 წელი, თუ ვიმსჯელებთ სასამართლოს განაჩენით, იგივე გელოდებათ თქვენ და ირაკლი ღარიბაშვილს. ვინაიდან ციხიდან მკვლელების სასეირნოდ გამოყვანაზე უფრო დიდი დანაშაულია, სტრასბურგის სასამართლოს მიერ აღიარებული რევაზ დვალიშვილის სავარაუდო მწამებელის პოლიციის სამმართველოს უფროსად დანიშვნა . არც ერთ დიქტატორს არ შერჩენია ევროპის ადამიანის უფლებათა სასამართლოს გადაწყვეტილების იგნორირება და არც თქვენ არ შეგრჩებათ. როდესაც ევროპის ადამიანის უფლებათა სასამართლომ გამოიტანა გადაწყვეტილება ასანიძე - საქართველოს წინააღმდეგ (ეს საქმეც მე მოვიგე სტრასბურგში ) ასლან აბაშიძემ იმავე დღეს გაათავისუფლა თენგიზ ასანიძე საპატიმროდან, აუღო თვითმფრინავის ბილეთი და გამოაფრინა თბილისში, ასლან აბაშიძეზე უარესი მმართველი თუ გვეყოლებოდა საქართველოში, ყველაზე ბოროტ სიზმარში ვერ ვნახავდით.
2. მერიის მაღალჩინოსნები, რომ დააკავეს და დაადეს ბორკილები ეს ტელევიზიით იხილა მთელმა საქართველომ, თქვენ განაცხადეთ რასმუსენის სტუმრობის დროს, რომ მათი დაკავება არ გვაწყობდაო. თქვენ თუ აღიარებთ, რომ მოხდა მოწმედ დაბარებული მოქალაქეების დაკავება, მაშინ ყველა ის პირი, რომელიც მონაწილეობდა მოწმედ დაბარებული მოქალაქეების უკანონო დაკავებაში სულ მინიმუმ ელოდა 5 წელი სასჯელი. თქვენ ეს ხალხი დაიცავით, რაც წარმოადგენს თანამდებობრივ დანაშაულს, (რაც ბრალად შეერაცხა სააკაშვილს) მოგვიანებით ცნობილი გახდა რატომ. დაააფარეთ სავარაუდო დამნაშავეებს ხელი, ფინანსური პოლიციის მაშინდელი ხელმძღვანელი რომელმაც სავარაუდოდ მოახდინა მოწმედ დაბარებულ მოქალაქეებზე ბორკილების დადება, იყო ფარცხალაძე, რომლის გაწირვა თქვენ არ გინდოდათ, რადგან ყაჩაღობაში გასამართლებული პირის მთავარ პროკურორად დანიშვნას ფიქრობდით, რაც ასევე არ გაუკეთებია არავის საქართველოს უახლოეს ისტორიაში.
3. როდესაც სააკაშვილის ხელისუფლების დროს, წამებაში მოკლეს ხაშურის პოლიციაში მოწმედ დაბარებული ქიმერიძე, თქვენ ლამის იტირეთ და შეგვპირდით, რომ ჩემი ხელისუფლებაში მოსვლის შემდეგ, ასეთი რამეები არ მოხდებაო. მოხვედით ხელისუფლებაში და მოწმედ დაბარებული მოქალაქის სასამართლოში დაკითხვა გადაავადეთ ორი წლით და დააკანონეთ კიდევ ორო წლით ქვეყანაში მოწმედ დაბარებული მოქალაქეების წამება და არაადამიანური მოპყრობა. მიუხედავად იმისა, რომ თქვენ ოფიციალურად პრემიერობიდან იყავით წასული დაუპირისპირდით საქართველოს პრეზიდენტს, რომელიც აპირებდა ვეტოს დადებას პარლამენტის მიერ მიღებულ გადაწყვეტილებაზე.
4. თქვენი ხელისუფლების უმთავრესი დაპირება იყო, რომ ქვეყანაში დამთავრდებოდა ტოტალური მოსმენები, თქვენ და ღარიბაშვილმა მოახდინეთ ძალადობა პარლამენტზე, რომელმაც დააკანონა შინაგან საქმეთა სამინისტროს მხრიდან უკანონო მოსმენები, რაც ამაზრზენი ფაქტია.
5. თქვენ საქართველოს მოსახლეობას არჩევნების წინ დაპირდით, რომ დაისჯებოდნენ ის პირები ვინც უკანონოდ ასამართლებდა უდანაშაულო მოქალაქეებს და ართმევდა ქონებას. საქართველოში მოქალაქეებისთვის ქონების ჩამორთმევა ძირითადად ხორციელდებოდა ფინანსური პოლიციის მხრიდან. თქვენმა ხელისუფლებამ კი ფინანსური პოლიციის კადრი დანიშნა მთავარ პროკურორად და ფინანსური პოლიციის თანამშრომლებით აავსეთ პროკურატურა.
6. როდესაც მოხვედით ხელისუფლებაში თქვენმა ხელისუფლებამ მიმართა მოსახლეობას, რომ იმ შემთხვევაში, თუ მის მიმართ განხორციელდებოდა რაიმე სახის უკანონო ქმედება, მიემართათ სამართალდამცავი ორგანოებისთვის. სააქართველოს მოსახლეობამ თქვენ დაგიჯერათ. მთავარ პროკურატურასთან დადგა რიგები, სადაც შევიდა 20 000 საჩივარი. თქვენ მოატყუეთ დაზარალებული ხალხი და მათ მიერ შემოტანილი საჩივრები პროკურორების წინააღმდეგ, განსახილველად აწერდით იმავე პროკურორებს, ვისაც საცოდავი ხალხი უჩიოდა. იუსტიციის სამინისტრო დაზარალებულ მოქალაქეების საჩივრებზე აგზავნიდა დაშტამპულ პასუხებს, რომ შეიქმნება ხარვეზის დამდგენი კომისია და თქვენს საჩივარს განვიხილავთო. გაუბედურებული და დაზარალებული მოსახლეობა ერთი წელი ელოდა ხარვეზის დამდგნენი კომისიის შექმნას, მაგრამ თქვენ განაცხადეთ, რომ კომისია აღარ შეიქმნებაო აქაც მოატყუეთ საცოდავი ხალხი.
7. რამოდენიმე თვე ატყუებდით ხალხს 100 საწარმო გავხსენიო, მაგრამ, ოფიციალური მონაცმებით, საქართველოში სამუშაო ადგილები თქვენი ხელისუფლების პირობებში პირიქით შემცირდა.
8. ჟურნალისტური გამოკვლევების შედეგად დადგინდა, რომ თქვენმა ჩინოვნიკებმა 2013 წელს 138 მილიონი ლარი პრემია აიღეს მაშინ როდესაც ვერ შეივსო ბიუჯეტი და თქვენმა ხელისუფლებამ საგარეო ვალი აიღო, როგორ შეიძლება ჩინოვნიკებს მიეცეს ამხელა პერმია ასეთ ღარიბ ქვეყანაში?! ეს ტენდენცია გრძელდება თბილისის მერმა ნარმანიამ დანიშვნიდან რამოდენიმე დღეში გამოაცხადა მერიის ბიუჯეტი გახარჯულად და კომერციული ბანკიდან ვალი უნდა ავიღოთო. ვალის აღების შემდეგ ნარმანიამ მაგალითად, შეზღუდული პასუხისმგებლობის საზოგადოება ,,თერმესი" რომელიც მერიას ემორჩილება, დირექტორს და მის სამივე მოადგილეს დანიშვნიდან ოთხ დღეში მოუმატა სახელფასო სარგო 100 %-ით. მინდა დაგისვათ კითხვა, თანამდებობაზე დანიშნულმა პირმა, რომელსაც აქვს საქართველოს პირობებში საკმაოდ მაღალი, 2800 ლარი ხელფასი, ოთხ დღეში, ისეთი რა უნდა გააკეთოს, რომ მათ მიეცეთ სარგო ყოველთვიური კიდევ 2800 ლარი? ეს კანონის ენაზე სავარაუდოდ არის სისხლის სამართლის დანაშაული და წარმოადგენს კორუფციულ გარიგებას. საკრებულოში მომუშავე პირებისთვის ჯამში გამოყოფილია მრავალმილიონიანი პრემიები, როცა თბილისის მერი იღებს ვალს ფული არ არისო.
9. და ბოლოს, ადვოკატების დევნა, რამაც შეუქცევადი სახე მიიღო, მინდა გაგახსენო, რომ როდესაც დაკავებული ადვოკატების გამო, მე ბრიუსელში ჩავატარე აქცია ადვოკატების დაცვის მიზნით, მაშინ დაიწყეს ადამიანის უფლებათა ორგანიზაციებმა საუბარი სააკაშვილის დიქტატორობაზე, ვინაიდან ვერ გაგიგიათ, რომ ადვოკატებს არ უნდა ებრძოლოთ, ჩემგან ელოდე იმას, რაც მიიღო სააკაშვილმა. საქართველოს ისტორიაში არ ყოფილა ფაქტი, რომ ადვოკატებისთვის არ მიეცათ საქმის მასალები. სააკაშვილის დროსაც იყო გრიფით საიდუმლო მასალები, მაგრამ ადვოკატებს საქმის მასალებს აძლევდნენ. პირველად, საქართველოს ისტორიაში, მთავრობის სხდომაზე მოიტანეს გრიფით საიდუმლი საქმის მასალები, დაურიგეს მთავრობის წევრებს, საგანელიძე ვერ მიხვდა, რომ ამის შესახებ არ უნდა ეთქვა და ყველაფერი დაამღერა, რომ მან მთავრობის სხდომაზე ნახა საქმის მასალები და დარწმუნდა, რომ ალასანიას უწყების ჩინოვნიკებმა დანაშაული ჩაიდინეს. სააკაშვილისთვის პრეზიდენტობის დროს მისთვის, რომ გეთქვა პასუხისგებაში მიგცემენო, მასხრად აიგდებდა. ასევე მოგდით თქვენ და ღარიბაშვილს, გგონიათ ხართ ხელშეუხებლები, მაგრამ იცოდეთ ისტორია ყველას მიუჩენს თავის ადგილს. მინდა გირჩიოთ, რადგან თქვენს გუნდში აღმოჩნდა პიროვნება, რომელიც მთავრობის სხდომაზე ერთ საათში ადგენს ადამიანების დანაშაულს და უდანაშაულობას იქნებ დაგეწესებინათ უდიდესი მოაზროვნე ბატონი საკანდელიძის ორდენი.
10. ბატონო ახალო შუქურა, მე შეგნებულად არაფერს ვამბობ წინასაარჩევნოდ გაცემულ დაპირებებზე, პენსიების ზრდაზე, უმუშევრობის დაძლევაზე და ასე შემდეგ, ეს ყველამ ვიცოდით, რომ პოლიტიკური აფიორა იყო, მაგრამ სამართლებრივი დაპირებების შეუსრულებლობის გამო, რომელმაც მომავალში უნდა მოიტანოს ქვეყნის ეკონომიკური განვითარება თქვენ პასუხი მოგეთხოვებათ", - ნათქვამია ზაზა ხატიაშვილი ღია წერილში.