ქალაქ ხარკოვის მილიციის თანამშრომლებმა ადგილობრივ მოქალაქეზე ყაჩაღურ თავდასხმაში ეჭვმიტანილი ორი პირი დააკავეს. მათგან ერთი, 47 წლის, ანალოგიური დანაშაულებების გამო ნასამართლევი უკრაინის, ხოლო მეორე საქართველოს 42 წლის მოქალაქე აღმოჩნდა, რომელიც ასევე მრავალჯერ არის ნასამართლევი.
გამოძიებით დადგინდა, რომ მსხვერპლზე თავდასხმის დროს ბოროტმოქმედებს სახეზე ნიღბები ეკეთათ და ცეცხლსასროლი იარაღით იყვნენ აღჭურვილნი. დაყაჩაღებისას დაზარალებულს 140 ათასი რუბლის ოდენობის თანხა წაართვეს და ადგილიდან მიიმალნენ, თუმცა სამძებრო-ოპერატიული ღონისძიებების შედეგად, მათ კვალს მალევე მიაგნეს.
ბოროტმოქმედებმა დაკავებისას სამართალდამცავებისთვის შეიარაღებული წინააღმდეგობის გაწევა სცადეს.
ხარკოვის მილიციამ გატაცებული თანხა და დანაშაულის იარაღი ამოიღო.
ფაქტზე აღძრულია სისხლის სამართლის საქმე.