საპარლამენტო უმცირესობის ლიდერი დავით ბაქრაძე პრეზიდენტის საკანონმდებლო ორგანოში გამოსვლის შეფასებისას აცხადებს, რომ იგი იზიარებს მარგველაშვილის დამოკიდებულებას, რომ საქართველოში პროკურატურის უკონტროლობა არის სერიოზული პრობლემა.
"პრეზიდენტის გამოსვლაში იყო რამდენიმე მნიშვნელოვანი მესიჯი. ჩემთვის აბსოლუტურად მისაღები და სწორი გახლდათ ფორმულირება, რომ სახელმწიფო ინსტიტუტები არ უნდა ემსახურებოდეს პიროვნებებს, რაც დღევანდელ საქართველოში პრობლემაა. მე ვეთანხმები პრეზიდენტის დამოკიდებულებას, რომ დღეს საქართველოში პროკურატურის უკონტროლობა გახლავთ სერიოზული პრობლემა და უნდა შეიქმნას მექანიზმები, რომელითაც პროკურატურა გაკონტროლდება პარლამენტისა და საზოგადოების მხრიდან. მნიშვნელოვანი იყო პრეზიდენტის მესიჯი იმაზე, რომ შინაგან საქმეთა სამინისტროს არ ქონდეს შეუზღუდავი უფლებები და უნდა მოხდეს მისი დემოკრატიზაცია და მათ შორის მოსმენების შეზღუდვების მხრიდანაც", _განაცხადა დავით ბაქრაძემ.
შეგახსენებთ, რომ პრეზიდენტმა გიორგი მარგველაშვილმა საკანონმდებლო ორგანოში სიტყვით გამოსვლისას პროკურატურის მუშობაზე გაამახვილა ყურადღება და აღნიშნა, იმისთვის, რომ მოიხსნას კითხვები უწყების პოლიტიზაციასთან დაკავშირებით, განმსაზღვრელია მისი ინსტიტუციონალური დამოუკიდებლობის უზრუნველყოფა
,,ამასთან, განსაკუთრებით უნდა შევჩერდე პროკურატურის რეფორმირების საკითხზე. იმისთვის, რათა ერთხელ და სამუდამოდ მოიხსნას კითხვები პროკურატურის პოლიტიზაციასთან დაკავშირებით, განმსაზღვრელია მისი ინსტიტუციონალური დამოუკიდებლობის უზრუნველყოფა. ამისათვის აუცილებელია გაბედული ნაბიჯების გადადგმა და მათ შორის საკანონმდებლო ცვლილებების განხორციელება", _განმარტა მერგველაშვილმა.