ქვეყანაში შემქნილ ვითარებაზე შეხედულებები და მოსაზრებები გავცვალეთ, - ამის შესახებ თავდაცვის ყოფილმა მინისტრმა ირაკლი ალსასანიამ საქართველოს პრეზიდენტ გიორგი მარგველაშვილთან შეხვედრის შემდეგ განაცხადა.
მისი თქმით, შეხვედრაზე ასევე აღინიშნა, რომ მნიშვნელოვანია თავდაცვის სამინისტროს ირგვლივ მიმდინარე პროცესები ტრანსფარანტულად წარიმართოს და საქმეზე ობიექტური ჭეშმარიტება დადგინდეს.
"საქართველოს პრეზიდენტთან შეხვედრა დაგეგმილი მქონდა. ქვეყანაში შემქნილ ვითარებაზე გავცვალეთ შეხედულებები და მოსაზრებები. მე ბუნებრივია, მქონდა მოსახსენებელი ის თემები, რომელიც დაწყებილი იყო თავდაცვის სამინისტროში და რომლის საქმის კურსში იყო პრეზიდენტი. იმედი გამოვთქვით, რომ ეს გაგრძელდება, რადგან უკავშირდება სწორედ ჩვენს იმ მთავარ, ეროვნულ ამოცანას, რომ ჩვენ ევროპის და ევროატლანტიკური სივრცის ნაწილი გავხდეთ. ასევე, საუბარი გვქონდა ქვეყნის თავდაცვისუნარიანობის გაძლიერებაზე. იმედი გამოვთქვით, რომ გამოძიება, ახლა უკვე საზოგადოებისთვის ამ ძალიან ცნობილ საქმებზე, ღიად და ტრანსფარანტულად წარიმართება და ობიექტური ჭეშმარიტება დადგინდება. საზოგადოება დაინახავს, თუ რა მიღწევები ჰქონდა არმიას და თავდაცვის სამინისტროს ბოლო წლების განმავლობაში. ვისაუბრეთ ასევე იმაზე, რომ ჩვენს ქვეყანაში ძალიან მნიშვნელოვანია, პოლიტიკური, განსაკუთრებით კი, პროდასავლური ძალები გაძლიერდეს, ქვეყანამ გააძლიეროს ინსტიტუტები და ინსტიტუტები იღებდეს მონაწილეობას ქვეყნიოს მართვაში", - განაცხადა ალასანიამ.