იუსტიციის მინისტრი თეა წულუკიანი განსაკუთრებულ ვერაფერს ხედავს იმაში, რომ აუდიტის სამსახურმა თავდაცვის სამინისტროზე დასკვნა მოამზადა. როგრც საკითხის კომენტირებისას ქობულეთის მუნიციპალიტეტში სტუმრობისას წულუკიანმა განაცხადა აუდიტის სამსახური იუსტიციის სამინისტროშიც იყო შესული და ეს ჩვეულებრივი სამუშაო პროცესია.
" განსაკუთრებულს, რომ აუდიტის სამსახურმა თავდაცვის სამინისტროზე დასკვნა მოამზადა, მე პირადად, ვერ ვხედავ, რადგან იუსტიციის სამინისტროშიც იყო აუდიტის სამსახურის შემოსული და ეს ჩვეულებრივი შემოწმების პროცესია. მეც ველოდები ჩემს სამინისტროსთან მიმართებაში რას იტყვის აუდიტის სამსახური", - აღნიშნა თეა წულუკიანმა.
სახელმწიფო აუდიტის სამსახური თავდაცვის სამინისტროში განხორციელებული შემოწმების მასალებს პარლამენტს რამდენიმე დღეში გადაუგზავნის. ამის შესახებ ჟურნალისტებს გენერალურმა აუდიტორმა, ლაშა თორდიამ მას შემდეგ განუცხადა, რაც გუშინ უმრავლესობის ლიდერმა, დავით საგანელიძემ აუდიტის სამსახურს თავდაცვის სამინისტროში განხორციელებული შემოწმების შედეგად არსებული მასალების პარლამენტისთვის გადაგზავნა სთხოვა.
"ის მასალები, რომლებიც ჩვენს მიერ უკვე არის გადაგზავნილი მთავარ პროკურატურაში და რომელიც, ჩვენი აზრით, შეიცავს დანაშაულის ნიშნებს, რა თქმა უნდა, პარლამენტის მოთხოვნის შესაბამისად გადაეგზავნება თავდაცვის და უშიშროების კომიტეტს, ასევე ნდობის ჯგუფს," - განაცხადა თორდიამ.
მისივე განმარტებით, აუდიტის სამსახურის მასალები არ შეეხება ე.წ. კაბელებისა და სამხედროების კვებასთან დაკავშირებულ საქმეებს.
"ჩვენ გვაქვს მასალები, რომლებიც უკავშირდება სხვა ტიპის შესყიდვებს, რაზეც ინფორმაციას მივაწვდით ნდობის ჯგუფს," - აღნიშნა სახელმწიფო აუდიტის სამსახურის უფროსმა.
აუდიტის სამსახური თავდაცვის სამინისტროში 2013 წლის ზაფხულიდან მუშაობს. ის უწყების მიერ 2011, 2012 და 2013 წლებში განხორციელებული სამუშაოების საკითხს სწავლობს.