გურჯაანის რაიონის სოფელ კოლაგში ავარიის შედეგად პატრულ-ინსპექტორი გოჩა ომსარაშვილი დაღუპვის ფაქტზე გამოძიება როგორც ,,ჯი-ეიჩ-ენს" მთავარ პროკურატურაში განუცხადეს სსკ 276-ე მუხლის მე-5 ნაწილით მიმდინარეობს რაც ტრანსპორტის მოძრაობის უსაფრთხოების ან ექსპლუატაციის წესების დარღვევას გულისხმობს, რამაც ადამიანის სიცოცხლის მოსპობა გამოიწვია.
შეგახსენებთ, რომ კახეთის საინფორმაციო ცენტრის ინფორმაციით, საპატრულო პოლიციის კახეთის სამმართველოს თანამშრომელი გოჩა ომსარაშვილი, რომელიც გვიან ღამით ჩალაუბნის საგუშაგოდან სახლში ბრუნდებოდა, ცენტრალურ საავტომობილო გზაზე ხიდის მშენებლობისთვის გაჭრილ თხრილში გადავარდა. გოჩა ომსარაშვილი მანქანას თავად მართავდა. ის შემთხვევის ადგილზე გარდაიცვალა.
კოლაგში ხიდის სამშენებლო სამუშაოებს შპს „მითი" აწარმოებს. საავტომობილო გზების დეპარტამენტის ინფორმაციით, ხელშეკრულების მიხედვით მშენებლობა უნდა დაწყებულიყო 26 ივნისს და უნდა დასრულდეს 30 ნოემბერს. პროექტის ღირებულება 642 400 ლარია.
ავტოსაგზაო შემთხვევის თვითმხილველების თქმით, მშენებარე ხიდის ტერიტორია მყარი კონსტრუქციით რომ ყოფილიყო შემოღობილი, შესაძლოა მანქანა თხრილში ვერ გადავარდნილიყო.
ბაკურციხე - გურჯაანის საავტომობილო გზაზე სარეაბილიტაციო სამუშაოებს , კომპანია „სერპანტინიც" ატარებს. როგორც კახეთის საინფორმაციო ცენტრს საავტომობილო გზების დეპარტამენტში განუცხადეს, „სერპანტინი" ახორციელებს ბაკურციხიდან გურჯაანის ჩათვლით საავტომობილო გზის და სანიაღვრე არხების რეაბილიტაციას. უნდა აღინიშნოს, რომ გზის ზოგიერთი მონაკვეთი გადათხრილია და გამაფრთხილებელი ნიშნებიც არ დგას, რაც ავტ სატრანსპორტო შემთხვევების რისკს ზრდის. მაგალითად, „სერპანტინს" ხიდის რეაბილიტაციის გამო გადაკეტილი აქვს მოძრაობა გურჯაანში, აგრარული ბაზრის თავში მდებარე ცენტრალურ საავტომობილო გზაზე და გამაფრთხილებელი ნიშნები არა ხიდამდე, არამედ მხოლოდ ზედ ხიდზე დგას. საავტომობილო გზების დეპარტამენტის ცნობით, სარეაბილიტაციო სამუშაოების მიმდინარეობისას, გზებზე მოძრაობის უსაფრთხოების მიზნით ზედამხედველობას მშენებელი კომპანიების მეშვეობით ახორციელებენ.
