ერევანში გამართულ პრეს-კონფერენციაზე პოლიტოლოგმა ანდრეას გუკასიანმა კომენტარი გაუკეთა საქართველოში განხორციელებულ სამთავრობო ცვლილებებს და აღნიშნა, რომ მისი აზრით, თბილისში მომხდარი გადადგომები არანაირად არ უკავშირდება რუსეთს და რუსულ გავლენებს საქართველოს ხელისუფლებაზე. „მთავრობის წევრთა გადადგომები შემთხვევითი არ ყოფილა, ეს სცენარი დიდი ხანია მზადდებოდა. ირაკლი ალასანია ყველაზე ახლოს დგას მიხეილ სააკაშვილის ოპოზიციურ პარტიასთან - „ერთიან ნაციონალურ მოძრაობასთან" და ადრე პრეზიდენტსაც ტოლერანტულად ეკიდებოდა. თუმცა, როცა ექს-პრეზიდენტის წინააღმდეგ სისხლის სამართლის საქმე აღიძრა, ბევრი პოლიტიკოსი და ჩინოვნიკი არჩევანის წინაშე დადგა: ან ისინი ღებულობდნენ მთავრობის ასეთ პოლიტიკას, ანდა ვინც ყოყმანობდა, კოალიციიდან წავიდოდნენ. ირაკლი ალასანია, როგორც ჩანს ყოყმანობდა, ამიტომაც თანამდებობიდან გაუშვეს", - თვლის ანდრეას გუკასიანი.
საქართველოში მომხდარი მოვლენები ოლიგარქისა და სახელმწიფოს მძიმე ურთიერთდამოკიდებულების შედეგია. „იმის მიუხედავად, რომ ბიძინა ივანიშვილს არავითარი თანამდებობა არ უკავია და, შესაბამისად, არავითარ პასუხისმგებლობას არ განიცდის, ქართული საზოგადოება მაინც გახდა იმის მოწმე, თუ როგორი ავტორიტეტი აქვს მას და როგორი გავლენის მოხდენა შეუძლია საქართველოს პოლიტიკაზე. აქედან გამომდინარე, არბიტრის რეალურ როლს პოლიტიკურ ორგანიზაციებსა და სახელმწიფო ხელისუფლების ცალკეულ შტოებს შორის სწორედ ოლიგარქი ასრულებს და არა პრეზიდენტი გიორგი მარგველაშვილი", - ხაზი გაუსვა პოლიტოლოგმა.
ანდრეას გუკასიანმა აღნიშნა, რომ ბიძინა ივანიშვილი ის პოლიტიკური მოღვაწეა, რომელმაც რიგი პოლიტიკური ორგანიზაციები „იყიდა", მიიყვანა ისინი ხელისუფლებაში, მანვე ჩამოაყალიბა დღეს მოქმედი ოპოზიცია, რათა თავისი ზემოქმედების არხები ჰქონოდა საქართველოს საშინაო პოლიტიკაზე და საერთოდ, სახელმწიფო სისტემაზე. თანაც ყველაფერი ისე გააკეთა, რომ თვითონ ამ სისტემის გარეთ იმყოფება და ქვეყანაში მიმდინარე პროცესებზე არავითარ პასუხისმგებლობას არ იღებს".