რუსეთისთვის სომხეთის საზღვრებთან უსაფრთხოების დერეფნის შექმნა უკვე აუცილებელი გახდა, - ამის შესახებ ცნობილი რუსი პოლიტოლოგი მიხეილ ჩერნოვი რუსულ მედიაში გამოქვეყნებულ სტატიაში ამბობს და აღნიშნავს, რომ ამიერკავკასიაში რუსეთის ფედერაციის ერთ-ერთი მთავარი ამოცანა ,,სომხეთის საზღვარზე პირდაპირი და საიმედო გასასვლელის უზრუნველყოფაა."
ამიერკავკასიის მიმართულებით რუსეთის მისწრაფებების რამდენიმე ვარიანტიდან, ჩერნოვი ,,მოკავშირეობისა და სტრატეგიული პარტნიორობის შესახებ ხელშეკრულების" იმ პროექტსაც ეხება, რომელიც ოკუპირებულ აფხაზეთს რუსეთმა შესთავაზა.
კიდევ უფრო მნიშვნელოვანი, რაც თავის სტატიაში რუსმა პოლიტოლოგმა განაცხადა, არის ის, რომ ,,პოლიტიკური არეულობის შემთხვევაში, რუსეთს მოუწევს მხარდაჭერა საქართველოს სხვა რეგიონებსაც გამოუცხადოს."
მასალის გამოქვეყნების შემდეგ ქართველ ჟურნალისტებთან გაკეთებულ განმარტებებში, რომელ რეგიონებს გულისხმობს ის და შესაძლებელია თუ არა, საქართველოში პოლიტიკური დესტაბილიზაციის შემთხვევაში, რუსეთმა ჯარი ისევ შემოიყვანოს, ჩერნოვის პასუხი ორაზროვანი იყო.
,,ეს შეიძლება საქართველოს ყველა იმ რეგიონს შეეხოს, რომელიც დახმარებისთვის რუსეთს მიმართავს. რაც შეეხება პრობლემის გადაწყვეტაში სამხედრო ძალის მონაწილეობას, ეს იქნება უკიდურესი ზომა.
როგორც უკრაინაში მიმდინარე მოვლენებმა გვიჩვენა, რუსეთის ფედერაცია რეგიონში მშვიდობიანი მოქალაქეების მასობრივი დაღუპვის შემთხვევაშიც კი არ აპირებს ძალის გამოყენებას.
იმედი მაქვს, რომ ქართველ ხალხს და ქართულ ელიტას ეყოფა სიბრძნე და სიმტკიცე იმისთვის, რომ ხსენებული სცენარისკენ არ წავიდეს." - განაცხადა ჩერნოვმა.
მასალის გამოყენების პირობები