ქართული დიპლომატია გააკეთებს ყველაფერს იმისთვის, რომ განამტკიცოს პარტნიორობა ყველა მეგობარ სახელმწიფოსთან, - ასე მიმართა საგარეო საქმეთა მინისტრად დანიშვნის შემდეგ თამარ ბერუჩაშვილმა საზოგადოებას.
ბერუჩაშვილმა პრემიერ-მინისტრს ნდობისთვის მადლობა გადაუხადა.
"განსაკუთრებით დიდი პასუხისმგებლობაა დღეს ამ პოსტის დაკავება. მე, ჩემი და საგარეო უწყების სახელით მინდა დაგპირდეთ, რომ ჩვენ ყველაფერს გავაკეთებთ იმისთვის, რომ ქართული დიპლომატია იყოს წარმატებული. ჩემთვის ძალიან მნიშვნელოვანია ის ფაქტი, რომ მეძლევა შესაძლებლობა ვემსახურო ქართულ სახელმწიფოს საგარეო საქმეთა მინისტრის თანამდენობაზე და ვემსახურო საქართველოს ევროპულ და ევროატლანტიკურ პრიორიტეტებს. მტკიცედ მწამს, რომ საქართველოს მომავალი არ არის საქართველო ევროპული მომავლის გარეშე.
ჩემთვის უაღრესად მნიშვნელოვანია, რომ ასეთ რთულ პროცესში, როგორიცაა საქართველოს ევროპული და ევროატლანტიკური გზა, მაქსიმალურად აქტიურად ჩართული იყოს არამარტო აღმასრულებელი ხელისუფლება და პოლიტიკოსები, არამედ საზოგადოების ყველა წევრი. ქართული დიპლომატია გააკეთებს ყველაფერს იმისთვის, რომ განამტკიცოს პარტნიორობა ყველა მეგობართან, შეიძინოს ბევრი ახალი მეგობარი და გააძლიეროს საქართველოს მომავალი და უსაფრთხოება", - განაცხადა ბერუჩაშვილმა.
