საქალაქო სასამართლოში თბილისის ყოფილი მერის გიგი უგულავას საქმის განხილვა ბრალდების მხარის მოწმეების დაკითხვით განახლდა. სხდომას თავად ბრალდებული, გიგი უგულავაც ესწრება.
დღვანდელ პროცესზე ბრალდების მხარემ ორი მოწმე, "ნაციონალური მოძრაობის" კოორდინატორები, მერაბ რაფავა და ელისო ნიკოლაშვილი წარმოადგინა. პროკურორ ქეთევან ჩაჩავას ინფორმაციით, მოწმეები სადაო თანხას უშუალოდ პარტიის კოორდინატორებს ურიგებდნენ.
დღვანდელი პროცესის შემდეგ, ბრალდების მხარეს დასაკითხი დაახლოებით 30 მოწმე დარჩება, ამის შემდეგ კი, სასამართლო სხდომებზე დაცვის მხარის მოწმეების დაკითხვა გარძლედება.
შეგახსენებთ, გიგი უგულავას და მერიის სხვა თანამშრომლებს გამოძიება დიდი ოდენობით სახელმწიფო სახსრების პარტიული ინტერესების სასარგებლოდ გაფლანგვას ედავება. მთავარი პროკურატურის ინფორმაციით, 48 მილიონი ლარი, რომელიც თბილისის განვითარების ფონდისთვის იყო გამიზნული, "ერთიან ნაციონალურ მოძრაობას" მოხმარდა.
