რამდენიმეთვიანი ოპერირების შემდეგ, ავიაკომპანია Yanair საქართველოს ბაზარს ტოვებს. როგორც უკრაინული მედია წერს, Yanair-ი საქართველოს მიმართულებით რეგულარულ რეისებს მინიმუმ 2015 წლის 28 მარტამდე აღარ შეასრულებს. უკვე ცნობილია, რომ Yanair-ი კიევი-ბათუმის რეისს 29 ნოემბრიდან შეაჩერებს, ხოლო თბილისი-კიევის რეისი, 26 ოქტომბრიდან უკვე შეჩერებული აქვს.
როგორც Yanair-ის მენეჯმენტი აცხადებს, რეისების შეჩერება ფინანსურ პრობლემებს უკავშირდება, რადგანაც აღნიშნულ მიმართულებებზე დაბალი მოთხოვნა ფიქსირდებოდა. მოთხოვნის არსებობის შემთხვევაში, კომპანიაში ჩარტერული რეისების შესრულებას არ გამორიცხავენ.
ავიაკომპანია Yanair-ი ქართულ ბაზარზე 2014 წლის დასაწყისში შემოვიდა და კიევიდან თბილისისა და ბათუმის მიმართულებით ასრულებდა ფრენებს.
შეგახსენებთ, რომ უკრაინული Yanair-ი 2012 წელს დაფუძნდა, ავიაკომპანიამ რეგულარული და ჩარტერული რეისების შესრულება 2013 წლიდან დაიწყო.