ამერიკის შეერთებული შტატების ელჩი საქართველოში რიჩარდ ნორლანდი მიიჩნევს, რომ თავდაცვის სამინისტროს მაღალჩინოსნების დაკავების საქმის მასალები დაცვის მხარისთვის ხელმისაწვდომი უნდა იყოს. როგორც ნორლანდმა ჟურნალისტებს საკითხის კომენტირებისას განუცხადა, საქმის მიმდინარეობას ყურადღებით აკვირდება.
"ჩვენ ყურადღებით ვადევნებთ თვალყურს როგორც ამ საქმესთან დაკავშირებულ პოლიტიკურ განცახდებებ, ასევე თავად საქმის მიმდინარეობას. ნებისმიერ შემთხვევაში არსებითად მნიშვნელოვანია, რომ საქმის განხილვა მოხდეს მართლმსაჯულებისა და კანონის პრინციპების სტანდარტების სრული დაცვით. ასევე მნიშვნელოვანია, რომ დაცვისთვის ხელმისაწვდომი იყოს საქმესთან დაკავშირებული მასალები და მათ ჰქონდეთ საქმის მასალებთან სრული წვდომა", - განაცხადა ნორლანდმა.
შეგახსენებთ, თავდაცვის სამინისტროს 5 თანამშრომელი, სახელმწიფო ბიუჯეტის კუთვნილი 4 102 872 ლარის გაფლანგვის ბრალდებით, საქალაქო სასამართლოს განჩინებით, 28 ოქტომბერს დააკავეს. სისხლის სამართლის საქმე ხუთივე დაკავებულის მიმართ 182- ე მულით აღიძრა, რაც თავისუფლების აღკვეთას 7-დან 11 წლამე ვადით ითვალისწინებს.
თავდაცვის სამინისტრო ინიციატივით გამოდის, საზოგადოების მაღალი ინტერესის გათვალისწინებით, აღნიშნულ შესყიდვას გრიფი მოეხსნას, რათა პროცესი გამჭვირვალედ წარიმართოს.
