პარლამენტის თავმჯდომარე დავით უსუფასვილი ,,საზოგადოებრი მაუწყებლის" ეთერში სტუმრობისას თავდაცვის სამინისტროს თანამშრომლების დაკავებას გამოეხმაურა და აღნიშნა, რომ ის სამართალდამცავი სისტემისგან მეტ პასუხისმგებლობას ელის.
"როდესაც დილით აფრინდა თავდაცვის მინისტრის თვითმფრინავი და იგი საფრანგეთსა და გერმანიაში შეხვედრაზეა მნიშვნელოვან საკითხებზე, სადაც ნატო-ს საკითხებზეა მსჯელობა, ნუ მაინც და მაინც პირველ ნიუსად მინისტრი ბერლინსა, თუ პარიზში შეიტყობს, რომ მისი თანამშრომლები დაკავებულები არიან, ჩემი აზრით, მთლად სწორი საქციელი არ არის. მე არ ვგულისხმობ იმას, რომ პროკურორს უნდა უკარნახოს ვინმემ როდის რა უნდა ქნას, მაგრამ პროკურორი როდესაც ებრძვის კორუფციას, მან უნდა იცოდეს, რომ კორუფციასთან ბრძოლის პროცესში სხვა მნიშვნელოვანი არ უნდა დააზარალოს. არ მინდა დავიჯერო, ვინმემ სპეციალურად, ალასანია რომ გაფრინდა მაშინ გამოიტანა ეს საკითხი საჯაროდ. თუმცა ის რომ გავითვალისწინოთ ამ ტიპის საკითხები და თავიდან ავიცილოთ ზედმეტი აჟიოტაჟები, რა თქმა უნდა, სწორი და კარგი იქნება", - განაცხადა დავით უსუფაშვილმა.
შეგახსენებთ, თავდაცვის სამინისტროს 5 თანამშრომელი, საქალაქო სასამართლოს განჩინების საფუძველზე 28 ოქტომბერს დააკავეს.
დაკავებულებს გამოძიება სახელმწიფო ბიუჯეტის კუთვნილი 4 102 872 ლარის გაფლანგვის ედავება.
საქალაქო სასამართლომ ხუთივე მათგანს, დახურულ სასამართლო სხდომაზე 2 თვიანი წინასწარი პატიმრობა შეუფარდა.
