ხვალიდან, 1-ლი ნოემბრიდან, შსს-ს ოპერატიულ-ტექნიკურ დეპარტამენტს ფარული მოსმენა-მიყურადების, ასევე კომუნიკაციის მაიდენტიფიცირებელი ინფორმაციის შენახვის უფლება აღარ აქვს. საქართველოს პრეზიდენტის მიერ "ელექტრონული კომუნიკაციების შესახებ" კანონში ცვლილებებზე ვეტოს დადების გამო ხვალიდან, 1-ლი ნოემბრიდან ძალაში შედის ნორმა, რომლის მიხედვით, შსს-ს კავშირგაბმულობისა და კომუნიკაციის ხაზებიდან და მათი შემაერთებლებიდან, სერვერებიდან, ბაზებიდან, კავშირგაბმულობის ქსელებიდან, კავშირგაბმულობის სხვა საშუალებებიდან ინფორმაციის რეალურ დროში მოპოვების ტექნიკური შესაძლებობების გამოყენების, სათანადო აპარატურის და ტექნიკური მოწყობილობების განთავსება-მონტაჟის კანონიერი უფლება ერთმევა.
თუ ვის ხელში უნდა იყოს, "გასაღები" კანონით დარეგულირებული არ არის. პარლამენტმა უნდა მიიღოს კანონი, რომლითაც განისაზღვრება, ვის ხელში იქნება ელექტრონული კომუნიკაციის კომპანიების მიერ განხორციელებულ საკომუნიკაციო ინფორმაციაზე წვდომის ტექნიკური შესაძლებლობა - ე.წ. გასაღები და ასევე, სად, რა ვადით და რა მოცულობით უნდა ინახებოდეს კომუნიკაციის მაიდენტიფიცირებელი ინფორმაცია.
