,,ნაცმოძრაობის" წევრი ზურაბ ჭიაბერაშვილი ,,ჯი-ეიჩ-ენთან" საუბარში აცხადებს, რომ პრემიერი ირაკლი ღარიბაშვილი ყალბი რიტორიკით ცდილობს ხელისუფლების ორწლიანი უმოქმედობა გადაფაროს. როგორც ჭიაბერაშვილმა პრემიერის მიერ მთავრობის ორწლიანი მუშაობის შეფასებისას განმარტა ღარიბაშვილი ლაპარაკობს აბსოლუტურად სხვა ქვეყანაზე ვიდრე 2014 წლის საქართველოზე.
,,პრემიერი ლაპარაკობს აბსოლუტურად სხვა ქვეყანაზე ვიდრე 2014 წლის საქართველოზე. ის ცდილობს ყალბი რიტორიკით გადაფაროს ორწლიანი უმოქმედობა რასაც ვხედავთ საქართველოს ხელისუფლების მხრიდან, კერძოდ, ეკონომიკა გაჩერებულია, სამუშაო ადგილები იკარგება და ა.შ", _განაცხადა ჭიაბერაშვილმა.
მისივე განმარტებით, ღარიბაშვილის გამოსვლა ეკონომიკურ თემატიკაზე საუბრისას ტყუილის რიტორიკას ეფუძნებოდა. კერძოდ პრემიერმა თქვა, რომ ორი წლის განმავლობაში დაიგო 40 კილომეტრი მაგისტრალი, რაც აბსურდია.
ჭიაბერაშვილის შეფასებით ღარიბაშვილი მთავრობის ორწლიანი ანგარიშის წარდგენისას გაექცა კრიმინალის თემაზე საუბარს.
,,იგი, პრაქტიკულად, გაექცა ამ თემას, რადგან რა უნდა თქვას, მთელმა საქართველომ იცის რომ კრიმინალი გაზრდილია", _განაცხადა ,,ჯი-ეიჩ-ენთან" საუბარში ჭიაბერაშვილმა და აღნიშნა, რომ პრემიერის გამოსვლა სოციალურ და ჯანდაცვის სფეროებში ასევე ტყუილს ეფუძნებოდა.
,,პირველ რიგში უნდა აღინიშნოს რომ პენსიები არ გაზრდილა და მთავრობას დღემდე არ უთქვამს თუ აპირებენ პენსიის გაზრდას, როდის და რამდენით, რადგან ამის ფული ბიუჯეტში არ არის. ჯანდაცვას რაც შეეხება ამ მიმართულებით იგივე პენსიონერებს სადაზღვევო პაკეტი გაუუარესდათ რადგან ჯანდაცვის სამინისტრო ხარჯებს ვერ აუდის", _განაცხადა ჭიაბერაშვილმა.
შეგახსენებთ, რომ პრემიერმა საქართველოს პრემიერ-მინისტრმა ირაკლი ღარიბაშვილმა საზოგადოებას ორწლიანი საქმიანობის ანგარიშს წარუდგინა. როგორც ღარიბაშვილმა განაცხადა ორი წლის განმავლობაში ,,ქართული ოცნების" ხელისუფლებამ მნიშვნელოვანი ცვლილებები განახორციელა.
