პარლამენტის ვიცე-სპიკერი მანანა კობახიძე ,,ნაციონალების" მიერ დაგეგმილ აქციას ეხმიანება და აცხადებს, რომ მისთვის გაუგებარია მისი შინაარსი. როგორც საკითხის კომენტირებისას კობახიძემ განაცხადა სწორედ "ნაციონალურმა მოძრაობამ" ხელისუფლებაში ყოფნის დროს ვერ ააცილა ქვეყანას პროვოკაცია.
,,ყველას აქვს მშვიდობიანად შეკრების უფლება, მაგრამ ჩემთვის გაუგებარია შინაარსი, რომელსაც დაგეგმილი აქცია ატარებს. ხელისუფლება ყოველდღიურ რეჟიმში მუშაობს სწორედ იმ მიმართულებით, რომ ჩვენი ქვეყნის ტერიტორიული მთლიანობა იყოს დაცული და ოკუპირებული ტერიტორიების მიმართ რუსეთის ქმედება იყოს საერთაშორისო განხილვის თემა. არ მგონია, რომ ეს პროტესტი სახელმწიფოს და ხელისუფლებისკენ უნდა იყოს მიმართული. გაუგებარია მათი ეს ქმედება. ჩემი აზრით, სწორედ "ნაციონალურმა მოძრაობამ" ხელისუფლებაში ყოფნის დროს ვერ ააცილა ქვეყანას პროვოკაცია, მოხდა ოკუპაცია და ოკუპირებული ტერიტორიების აღიარება", _განაცხადა კობახიძემ.
15 ნოემბერს, ,,ნაცმოძრაობა" საპროტესტო აქციას გამართავს. როგორც პარტიის წევრებთან ერთად გამართულ ბრიფინგზე ,,ნაცმოძრაობის" წევრმა ზურაბ ჯაფარიძემ განაცხადადა აქცია რუსთაველის გამზირზე გაიმართება.
,,ოკუპირებულ აფხაზეთში შექმნილი ვითარებიდან გამომდინარე და იქიდან გამომდინარე, რომ სახეზეა რუსეთის მხრიდან ღია და თავხედური ანექსიის მცდელობა და ამის შესაჩერებლად საქართველოს მთავრობა არაფერს აკეთებს. ჩვენ გადავწყვიტეთ ამა წლის 15 ნოემბერს დედაქალაქში, რუსთაველის გამზირზე მოვაწყოთ საპროტესტო აქცია, რომლის მიზანიც ხმის მიწვდენა იქნება როგორც საქართველოს ხელისუფლებისთვის, ასევე საერთაშორისო საზოგადოებისთვის. საქართველოს მიწა-წყლიდან გამოდევნილ ნახევარ მილიონზე მეტი ადამიანი არ შეეგუება რესეთის ანექსიას", _განაცხადა ჯაფარიძემ.
ჯაფარიძემ საზოგადოებასა და ყველა პოლიტიკურ ძალას მოუწოდა შეუერთდნენ აქციას.
,,ჩვენ მოვუწოდებთ ყველა ოპოზიციურ ძალას და თითოეულ ადამიანს, შემოუერთდნენ ამ აქციას და ვაცხადებთ მზადყოფნას დავიწყოთ კონსულტაციები 15 ნოემბრის აქციასთან დაკავშირებთ. ჩვენ არასდროს შევეგუებით აფხაზეთის ანექსიას", _განაცხადა ჯაფარიძემ.
