საპარლამენტო უმცირესობის წევრი სერგო რატიანი ,,ჯი-ეიჩ-ენთან" საუბარში აცხადებს, რომ აშშ-ის სახელმწიფო დეპარტამენტის გაკეთებული შეფასებები მძიმეა და საქართველო ნელ-ნელა იმკვიდრებს არათავისუფალი, ავტორიტარული სახელმწიფოს იმიჯს.
,,მძიმეა ის შეფასებები, რომელიც აშშ-ის სახელმწიფო დეპარტამენტმა გააკეთა. უნდა ვთქვათ, რომ ამ შეფასებების შემდეგ საქართველო ნელ-ნელა იმკვიდრებს არა დემოკრატიული, ამ ნახევრადდემოკრატიული ქვეყნის იმიჯს, არამედ არათავისუფალი, ავტორიტარული სახელმწიფოს იმიჯს, რაც სერიოზული პრობლემაა. ცუდია, როცა, ჩვენი მოკავშირეები საქართველოს აფასებენ, როგორც მაფიოზურ ქვეყნად, სადაც ერთი ადამიანი იღებს გადაწყვეტილებას. Eეს კი უარყოფითად აისახება როგორც ქვეყნის უსაფრთხოებაზე, ასევე ეკონომიკურ მდგომარეობაზე, რადგან არათავისუფალ სახელმწიფობთან არც ამერიკელები და არც სხვა პარტნიორები მნიშვნელოვან პროექტებს არ ახორციელებენ", _განაცხადა ,,ჯი-ეიჩ-ენთან" საუბარში რატიანმა.
მისივე თქმით, ხელისუფლება დაკავებულია მხოლოდ და მხოლოდ ერთი საქმით, ეს არის პოლიტიკური ოპონენტების დევნა.
,, კაცმა რომ თქვას ისინი განწირულნი არიან მხოლოდ ასეთი მოქმედებისთვის, რადგან სხვა საკითები ხელისუფლებისთვის არის დაუძლეველი. მათ არ შეუძლიათ იზრუნონ უმუშევრობაზე, ებრძოლონ კრიმინალს", _განაცხადა რატიანმა.
შეერთებული შტატები ყურადღებით ადევნებს თვალს საქართველოში ყოფილი ჩინოვნიკების წინააღმდეგ მიმართულ სასამართლო პროცესებს და შეახსენებს ქვეყნის მთავრობას, რომ იურიდიული სისტემა პოლიტიკური მიზნებისათვის არ უნდა იყოს გამოყენებული, - განაცხადა აშშ-ის სახელმწიფო დეპარტამენტის ოფიციალურმა წარმომადგენელმა ჯენი ფსაკმა, რომელმაც, ჟურნალისტთა თხოვნით, კომენტარი გაუკეთა თბილისის საქალაქო სასამართლოს მიერ ექს-მინისტრ ბაჩანა ახალაიას მიმართ გამოტანილ განაჩენს.
„ჩვენ კვლავ მივაპყრობთ საქართველოს მთავრობის ყურადღებას კანონიერებისა და პროცესუალური ნორმების დაცვაზე და ვიკვლევთ [ამ მოქმედების] გამჭვირვალეობის საკითხს, რათა არ იყოს იმის შეგრძნება, რომ იურიდიული სისტემა პოლიტიკური ანგარიშსწორებისთვის გამოიყენება", - აღნიშნა ამერიკელმა დიპლომატმა. მან ჟურნალისტებს შეახსენა, რომ შეერთებული შტატები ადრეც გამოხატავდა შეშფოთებას საქართველოში ზოგიერთი სასამართლო საქმის მიმართ და შეშფოთების საფუძველი ჯერ კიდევ არსებობს".
ამასთან, ჯენი ფსაკმა განაცხადა, რომ მას არ სურს ცალკეულ საქმეებზე ილაპარაკოს იმდენად, რამდენადაც ყოველ საქმეს თავისი სპეციფიკა აქვს. „მაგრამ იქ გამოტანილი განაჩენების მთელი სერია იყო და ამიტომაც თავის დროზე ამ მიზეზით ჩვენი შეშფოთება გამოვთქვით". „ჩვენ მხარს ვუჭერთ საქართველოს დემოკრატიულ განვითარებას, რომელიც პოლიტიკური პლურალიზმსა და ღია დებატებისადმი პატივისცემაში გამოიხატება"
