შერიგებისა და სამოქალაქო თანასწორობის საკითხებში სახელმწიფო მინისტრი, პაატა ზაქარეიშვილი სოფელ მოხეში სადავო შენობასთან დაკავშირებულ საკითხებს გამოეხმაურა და აღნიშნა, რომ შესასწავლია შესაბამისი სტრუქტურების მხრიდან თუ რა ფუნქცია ჰქონდა წარსულში აღნიშნულ შენობას. როგორც მინისტრმა საკითხის კომენტირებისას მთავრობის სხდომის შემდეგ განმარტა მისთვის მისაღებია თუ შენობაში ბიბლიოთეკა განთავსდება.
,, პირველ რიგში, უნდა დაიგმოს ნებისმიერი ფორმით ძალადობა. იქ, სადაც არის ძალადობა საქმე ვერ კეთდება და გამორიცხულია მოძალადეს ვინმემ მოუსმინოს, მითუმეტეს, როდესაც ძალადობა ხორციელდება პოლიციის, ანუ სახელმწიფოს წინააღმდეგ. მე არა მგონია, რომ ჩვენს ხელისუფლებაში დღეს ისეთი პირობები იყოს, რომ შეუძლებელი იყოს ნებისმიერი საკითხის მოგვარება მოლაპარაკებებით და მშვიდობიანი ფორმით", _განაცხადა ზაქარეიშვილმა.
მისივე განცხადებით, არ აქვს კონკრეტული ინფორმაცია განვითარებულ მოვლენებზე, რადგან აღნიშნულ საკითხებზე რელიგიის საკითხთა სახელმწიფო სააგენტო მუშაობს.
,,ჩემთვის როგორც ცნობილია, ამ სააგენტოსთვის არ მიუმართავთ ანუ ჩართული არ იყო ის სახელმწიფო სტრუქტურა, რომელსაც ევალება ასეთ დროს შეისწავლოს ვითარება. მე ვფლობ მხოლოდ იმ ინფორმაციით, რაც არის საჯარო. მართლაც არის ბევრი ურთიერთგამომრიცხავი კითხვები, საჭიროა ამიტომ მოლაპარაკება ამაზე მუშაობა. ჩემთვის მისაღებია გუბერნატორის განცხადება, რომ ეს შენობა იქნება ბიბლიოთეკა, კულტურულ-საგანმანათლებლო, ხოლო ადრე რა იყო ეს შენობა სჭირდება შესწავლა, რადგან ქრისტიანი მოსახლეობა ამბობს ერთს, მუსლიმები ამბობენ მეორეს. ამიტომ მართლაც საჭიროა ღრმა შესწავლა და იგი უნდა შეისწავლოს იმ სტრუქტურამ ვისაც ევალება ამ საკითხების დარეგულირება", _ აცხადებს ზაქარეიშვილი.
შეგახსენებთ, რომ ადიგენის რაიონის სოფელ მოხეში გუშინ დაპირისპირება მოხდა. ადგილობრივი მუსლიმებმა ერთ-ერთი შენობის დემონტაჟი გააპროტესტეს, სადაც, მათივე ინფორმაციით, ადრე მეჩეთი იყო.
პოლიციამ დაპირისპირების დროს 14 ადამიანი დააკავა. ადგილობრივი ხელისუფლება შენობაში მეჩეთის ფუნქციონირებას უარყოფს და აცხადებს, რომ აღნიშნული შენობის განახლების შემდეგ იქ ბიბლიოთეკა განთავსდება.