დღეს თბილისის მუნიციპალიტეტის საკრებულოს განათლებისა და კულტურის კომისიის თავმჯდომარემ ბრიფინგი გამართა. თამარ ტალიშვილმა საქართველოში ადგილობრივ თვითმართველობის არჩევნებთან დაკავშირებით ადგილობრივ და რეგიონულ ხელისუფლებათა კონგრესის რეზოლუციის თაობაზე ისაუბრა და განაცხადა, რომ ევროსაბჭოს მიერ მიღებული რეზოლუცია რამდენიმე უმნიშვნელოვანეს გზავნილს შეიცავს.
პირველი არის ის, რომ ხელისუფლებამ შექმნა თავისუფალი წინასაარჩევნო გარემო, აღკვეთა სააჩევნო გაყალბებები. ასევე გაუმჯობესდა საარჩევნო დემოკრატიის ხარისხი პირდაპირი არჩევითობისა და 50% პლიუს ერთი ბარიერის დაწესების გზით.
რეზოლუციაში ხაზგასმულია ხელისუფლების მიერ მედიასაშუალებებისათვის და კონკრეტულად ჟურნალისტებისათვის, თავისუფალი სამუშაო გარემოს უზრუნველყოფა.
"აღსანიშნავია, რომ რეზოლუცია ევროსაბჭომ ერთხმად მიიღო'',-განაცხადა თამარ ტალიაშვილმა.
დეპუტატმა ბრიფინგზე თვითმმართველობისთვის რეზოლუციის მნიშვნელობაზეც ისაუბრა და განმარტა, რომ გაიზარდა თვითმართველობის ლეგიტიმაცია. ამასთან, ამაღლდა ანგარიშვალდებულება ხალხისადმი და ხელისუფლების მიერ უზრუნველყოფილი დემოკრატიის ეს ახალი სტანდარტი როგორც ხელისუფლებას, ასევე საზოგადოებას ამ სტანდარტის გაუმჯობესებას ავალდებულებს.
"გამომდინარე იქიდან, რომ დემოკრატიის ტრადიციის მწირი მემკვიდრეობა გაგვაჩნია, ჩვენ ყველამ ერთად უნდა შევძლოთ დემოკრატიის - ამ ახალი სტანდარტის, როგორც ღირებულების ქართული კულტურის განუყოფელ ნაწილად დამკვიდრება.
საინფორმაციო საზოგადოების ეპოქაში ბეჭდვითი, სატელევიზიო, რადიო, ინტერნეტ მედიის თავისუფლება სიტყვისა და გამოხატვის თავისუფლების ტოლფასია. ჩვენ მედიასაშუალებებს აქტიურ თანამშრომლობას ვთავაზობთ და უახლოეს მომავალში მათთან შეხვედრას და ამ თემასთან დაკავშირებით მსჯელობას ვგეგმავთ'',-განაცხადა თამარ ტალიაშვილმა.