საგარეო საქმეთა მინისტრის მაია ფანჯიკიძის განცხადებით იმ შემთხვევაში თუ რუსეთსა და აფხაზეთს შორის ,,მოკავშირეობის და ინტეგრაციის შესახებ" ხელშეკრულება დაიდება, იგი ქართული მხარის მიერ შეფასდება როგორც საქართველოს ანექსიის მცდელობა. როგორც საკითხის კომენტირებისას ფანჯიკიძემ განაცხადა თავად აფხაზებიც კი გრძნობენ, რომ ეს არის მათი უფლებებისა და თვითმყოფადობის შევიწროების მცდელობა.
,,ვიტოვებ იმედს, რომ ეს ე.წ. ხელშეკრულება რუსეთსა და დე ფაქტო ხელისუფლებას შორის არ გაფორმდება. საერთაშორისო საზოგადოება, რა თქმა უნდა, ყურადღების გარეშე არ დატოვებს. საგარეო საქმეთა სამინისტროს სერიოზული მუშაობა აქვს გაწეული, რომ ამ ხელშეკრულების შესახებ საერთაშორისო საზოგადოება იყოს ინფორმირებული. ჩვენს საელჩოებს მიღებული აქვთ შესაბამისი ინსტრუქცია", - განაცხადა ფანჯიკიძემ.
ფანჯიკიძის განცხადებით, აღნიშნული საკითხი იქნება მომავალ კვირას, ლუქსემბურგში, ევროკავშირის წევრი ქვეყნების საგარეო საქმეთა მინისტრებთან დაგეგმილი შეხვედრის განხილვის მთავარი თემა.
