თავდაცვის მინისტრის ირაკლი ალასანიას განცხადებით, დიასპორას შეაქვს ძალიან დიდი წვლილი ჩვენი ქვეყნის განვითარებაში. როგორც მინისტრმა დიასპორის ეკონომიკური ფორუმის დასრულების შემდეგ ჟურნალისტებთან განაცხადა საქართველოს სჭირდება პატრიოტი მოქალაქეები, რომლებიც მზად იქნებიან ნებისმიერ შემთხვევაში ქვეყნის დამოუკიდებლობა დაიცვან.
,,დიასპორას შეაქვს ძალიან დიდი წვლილი ჩვენი ქვეყნის განვითარებაში, მათ შორის, ეკონომიკურ განვითარებაში. იცით თქვენ, რომ ჩვენგან წასული დიასპორის წარმომადგენლები ძალიან ეხმარებიან თავიანთ ოჯახებს და ძალიან კარგია საქართველოს ფინანსური განვითარებისთვის. მთავარია მოვახერხოთ ყველა გზა გავხსნათ მათი ჩართულობისთვის, რომ ქვეყნის პოლიტიკურ-სოციალურ განვითარებაში მიიღონ მონაწილეობა. ძალიან მიხარია, რომ ასეთი მიზიდულობა გაჩნდა სამშობლოს მხრიდან დიასპორების მიმართ იმიტომ, რომ საქართველოს სჭირდება პატრიოტი, გულანთებული მოქალაქეები, რომლებიც მზად იქნებიან ნებისმიერ შემთხვევაში ქვეყნის დამოუკიდებლობა დაიცვან", - განაცხადა ალასანიამ.
შეგახსენებთ, რომ სასტუმრო "შერატონ მეტეხი პალასში" დიასპორის ეკონომიკური ფორუმი გაიმართა, რომელიც დიასპორის საკითხებში სახელმწიფო მინისტრმა გელა დუმბაძემ განხსნა. ფორუმზე სიტყვით გამოვიდა პრემიერი, ირაკლი ღარიბაშვილი. ფორუმს მინისტრთა კაბინეტის და დიპლომატიური კორპუსის წარმომადგენლები ესწრებოდნენ.
