ეკონომიკისა და მდგრადი განვითარების მინისტრი გიორგი კვირიკაშვილი ავარეთ-კახეთის საავტომობილო გზის მშენებლობის საკითხს ეხმიანება და აცხადებს, რომ თუ უსაფრთხობეის კუთხით იგი პრობლემებს არ შექმნის, ცხადია რაც მეტი გზა იქნება, უკეთესია.
,,მოგეხსენებათ, ჩვენ განვაახლეთ ვაჭრობა რუსეთთან. ამ თვალსაზრისით, მე ვფიქრობ, ვაჭრობისთვის ხელშემწყობი იქნება რაც უფრო მეტი გზა გვექნება. როდესაც ლარსზე გვაქვს სტიქიით გამოწვეული პრობლემა, მგონი ურიგო არ იქნება გვქონდეს ალტერნატივა, რათა რუსეთ-საქართველოს შორის საქონელმა იმოძრაოს. რაც შეეხება პოლიტიკურ ჭრილს, ეს პრობლემები არავის არ მოუხსნია, არის ეს პრობლემები და ისინი გადაწყვეტას საჭიროებენ. ამისთვის, დიალოგი და საუბარია საჭირო, მაგრამ კიდევ ერთხელ ვიმეორებ, თუ არ არის უსაფრთხოების კუთხით სხვა რაიმე პრობლემა განსაკუთრებული, ვფიქრობ, რომ რაც მეტი გზა იქნება, მით უკეთესია ", - განაცხადა კვირიკაშვილმა.
შეგახსენებთ, რომ ავარეთ-კახეთის გზის მშენებლობასთან დაკავშირებით უკვე მიმდინარეობს მოსამზადებელი სამუშაოები, სამშენებლო ინფრასტრუქტურის შექმნა. გზის სიგრძე 80 კილომეტრი იქნება, აშენდება ხუთი გვირაბი და 25 ხიდი. ავტომაგისტრალი ერთმანეთთან დააკავშირებს კასპიისა და შავი ზღვების აუზს.
