ხანდახან ევროპას კარგად ვერ ვუხსნით, რას ვაკეთებთ და ხანდახან ჩვენ არ გვესმის, რას ვაკეთებთ, - აცხადებს გაზეთ "პრემიერისთვის" მიცემულ ინტერვიუში პარლამენტის წევრი რესპუბლიკური პარტიიდან ლევან ბერძენიშვილი. მისი თქმით, ზოგიერთ შემთხვევაში, სურთ კარგი გააკეთონ და არ გამოდის, ეს ჩვეულებრივი ამბავია.
"არ მიკვირს, როცა გვეუბნებიან, რომ, მაგალითად, ბაჩო ახალაიასთან მიმართებაში ჩვენ კანონს არ ვარღვევთ, მაგრამ ორი წელია ბაჩო ახალაია წინასწარ ძიებაშია და აღმკვეთი ღონისძიება მისჯილი არა აქვს. მას რაც მიესაჯა, მიხეილ სააკაშვილმა შეიწყალა და ადამიანის წინასწარ პატიმრობაში დიდი ხნით ყოფნას ევროპის არც ერთი დიდი სახელმწიფო არ მოგვიწონებს, ვისაც არ უნდა ეხებოდეს. ამის გარდა, ევროსაბჭომ აღნიშნა, რომ არ ესმით მიხეილ სააკაშვილის მეუღლისა და ბებიის ქონების ყადაღის ამბავი. მგონი, ეს ის საკითხია, რომ საქართველოში ვინც დაადო ყადაღა, რა როგორ ესმის, კარგად ვერ გეტყვით. მე იურისტი არ ვარ და დეტალების განხილვაში ვერ შევალ, მაგრამ არა მგონია, რომ საქართველოს მთავარი ამოცანა იყოს მიხეილ სააკაშვილის ბებიის ქონების დაყადაღება. თუკი სახელმწიფო ინტერესები უფრო მნიშვნელოვანია, ვიდრე მიხეილ სააკაშვილის ბებია, უნდა წავიდეთ უფრო მნიშვნელოვანისკენ. ამას გვეუბნება ევროპაც, მაგრამ, როგორც ახასიათებს ხოლმე ქართულ პრესას, უყურადღებოდ დარჩა ყველაფერი დადებითი, რაც რეზოლუციაში წერია, არადა, შეფარდება ასეთია: დაახლოებით 70% არის დადებითი და 30% _ უარყოფითი. ჩვენთან 100%-ით უარყოფითი გაშუქდა, რაც ნიშნავს, რომ ავადმყოფური დამოკიდებულებაა ტექსტების მიმართ და კიდევ უარესი, საქართველოში ტექსტებს არ კითხულობენ. რეზოლუცია, მგონი, ევროსაბჭოს დელეგატების გარდა, არავის წაუკითხავს. ამ თვალსაზრისით, მეტი სამუშაო აქვს ჩასატარებელი თავად საქართველოს სახელმწიფოს თავისავე თავთან", - განაცხადა ბერძენიშვილმა.
