საქართველოს მთავრობა მზად არის, მაქსიმალურად შეუწყოს ხელი ქართული დიასპორის ჩართულობას სახელმწიფოს აღმშენებლობის პროცესში, - ამის შესახებ, პრემიერ-მინისტრმა ირაკლი ღარიბაშვილმა დიასპორის ეკონომიკურ ფორუმზე სიტყვით გამოსვლისას განაცხადა.
პრემიერმა დიასპორის როლზე გაამახვილა ყურადღება და აღნიშნა, რომ მისი პოტენციალის მაქსიმალურად გამოყენება მნიშვნელოვანია.
მთავრობის მეთაური დარწმუნებულია, რომ ეკონომიკური ფორუმი ხელს შეუწყობს დიასპორის წარმომადგენლების მაქსიმალურ ჩართულობას ქვეყანაში მიმდინარე პროცესებში და მათ ხელისუფლების და ბიზნესის წარმომადგენლებთან უშუალო კონტაქტების დამყარების საშუალებას მისცემს.
"ჩვენი მთავრობა მზად არის, მაქსიმალურად შეუწყოს ხელი ქართული დიასპორის წარმომადგენლებს, რათა განავითარონ მეწარმეობა საკუთარ სამშობლოში. ჩვენ ვიზრუნებთ, რომ ყველა პირობა შეიქმნას რაც შეიძლება მეტი დიასპორული ინვესტიციის მოსაზიდად",-განაცხადა პრემიერმა.
ირაკლი ღარიბაშვილმა კმაყოფილებით აღნიშნა, რომ საქართველო პირველი ქვეყანაა პოსტსაბჭოთა სივრციდან, რომელიც დიასპორული ჩართულობის საერთაშორისო ალიანსში გაწევრიანდა.
პრემიერი მიიჩნევს, რომ ჰილარი კლინტონის მიერ დაარსებული ალიანსის წევრობა მნიშვნელოვნად გაზრდის აშშ-სა და სხვა ქვეყნებში ქართული დიასპორის ცნობადობას.
მთავრობის მეთაური მიესალმება ქართულ დიასპორებში ლობისტური ჯგუფების შექმნას და იმედოვნებს, რომ საზღვარგარეთ მცხოვრები თანამემამულეები თავიანთი დიდი პოტენციალით და საქმიანობით ხელს შეუწყობენ მსოფლიოში საქართველოს პოპულარიზაციას, მხარს დაუჭერენ ქვეყნის წინსვლასა და განვითარებას.
დიასპორის ეკონომიკურ ფორუმს პრემიერ-მინისტრთან ერთად მინისტრთა კაბინეტის წევრები და დიპლომატიური კორპუსის წარმომადგენლები დაესწრნენ.