კარასინმა და აბაშიძემ მლეთა-კობის გვირაბის გახსნაზე ისაუბრეს, - განაცხადა ექპერტმა მამუკა არეშიძემ გაზეთ "პრემიერისთვის" მიცემულ ინტერვიუში. მისი თქმით, ეს ინფრასტრუქტურა კეთდება იმისთვის, რომ რუსეთს ჰქონდეს მაქსიმალურად გახსნილი კომუნიკაციები სამხრეთ კავკასიაში შემოსასვლელად.
არეშიძის თქმით, ამ საკითხის გააქტიურება გამოიწვია გრიგოლ კარასინის მეორე განცხადებამ, სადაც ის ამბობს, რომ მიმდინარეობს მოლაპარაკება რუსულ და ქართულ დელეგაციებს შორის ინფრასტრუქტურის პროექტების რეალიზაციის თაობაზე საქართველოს ტერიტორიაზე.
"ამ პროექტებში იგულისხმება გზების მშენებლობა, რომლის გეგმა ჯერ კიდევ საბჭოთა დროიდან არსებობდა და კარასინმა ამას ხაზი გაუსვა. როდესაც მას ჩაეკითხნენ, რომელ პროექტზე იყო ლაპარაკი, მან დაღესტნის თემაზე უარი თქვა, მაგრამ ჩვენი არხებით გავარკვიეთ, რომ საუბარი ეხებოდა მლეთა-კობის გვირაბის გაკეთებას, რომელიც საქართველოს ტერიტორიაზე მდებარეობს და მიბმულია საქართველოს სამხედრო გზასთან. ამაში დევს ლოგიკა: საქართველოს სამხედრო გზა მიმდებარე ტერიტორიის არასწორ ექსპლოატაციასთან და კლიმატის ცვლილებასთან დაკავშირებით გახდა ზვავსაშიში ადგილი და აქედან გამომდინარე, აქვს აზრი იმას, რომ ვიფიქროთ ამ გზის პროფილის შეცვლაზე. მლეთა-კობის გვირაბი ზუსტად აქ ჯდება, რომელიც პირდაპირ გავიდოდა რუსეთის საზღვართან. ჩვენმა საზოგადოებამ ნაკლებად იცის, რომ, მაგალითად, როკის გზა, რომელიც ე.წ. სამხრეთ ოსეთს აკავშირებს ჩრდილოეთ ოსეთთან, ასეთივე მდგომარეობაში იყო ჩრდილოეთის მხრიდან, ამიტომ, როგორც ჩანს, რუსეთში ფიქრობენ საქართველოსთან ისეთი კომუნიკაციების შექმნაზე, რომელიც ზვავებისგან დაზღვეული იქნება. ასეთი ადგილი ორია: მამისონის უღლეტეხილი, რომელიც რაჭასა და ე.წ. სამხრეთ ოსეთში გამოდის და ბეშთა-ახალსოფლის გზა (ყვარელი). ეს ორივე გზა თავის დროზე ფუნქციონირებდა და ისტორიულად, მამისონის უღელტეხილი იყო მთავარი გადასასვლელი ჩრდილოეთ კავკასიაში, როცა არც როკი იყო და ლარსიც შედარებით მიუდგომელი გახლდათ. მე-19 საუკუნის 80-იანი წლებიდან მამისონის გზას დაერქვა `ვოენნო ოსეტინსკაია~, მესამე გზა იყო, რომელიც სოხუმში ჩადიოდა, ზუსტად იმ ყარაჩაეთ-ჩერქეზეთიდან, რომელსაც `ვოენნო სოხუმსკია~ ერქვა და აი, ამ გზების რეაბილიტაციაზე ზრუნავს ახლა რუსეთი. მესამე _ დაღესტნის გზას ერქვა `ავვარო კახეტინსკაია~ (დაღესტნური ტომი ავარები ცხოვრობდნენ იქ). ეს ყველა ისტორიული გზაა და რუსეთს სოხუმის სამხედრო გზაზე წინააღმდეგობას ქართველები უწევენ, დანარჩენ ორ გზაზე ჯერჯერობით მოლაპარაკება არ მიმდინარეობს", - აცხადებს არეშიძე.