ადამიანის უფლებათა დაცვისა და სამოქალაქო ინტეგრაციის კომიტეტმა 2015 წლის სახელმწიფო ბიუჯეტის პროექტის პლენარულ სხდომაზე განხილვას მხარი ერთხმად დაუჭირა.
კომიტეტის თავმჯდომარემ, ეკა ბესელიამ დღევანდელ სხდომაზე 2015 წლის სახელმწიფო ბიუჯეტის პროექტი შეაფასა, როგორც სოციალურად ორიენტირებული და გამჭვირვალე პროექტი, რომელიც ყველა კითხვას პასუხობს და გათვლილია მოსახლეობის კეთილდღეობასა და ქვეყნის ეკონომიკურ განვითარებაზე.
კომიტეტის სხდომაზე დეპუტატებს ბიუჯეტის პროექტი ფინანსთა მინისტრის მოადგილემ, გიორგი კაკაურიძემ წარუდგინა. პროექტის მიხედვით, 2015 წლის განმავლობაში მისაღები შემოსავლებისა და გასაწევი გადასახდელების მაჩვენებლები განისაზღვრება.
მისი თქმით, 2015 წლის სახელმწიფო ბიუჯეტი ემსახურება სამთავრობო პროგრამის - „ძლიერი, დემოკრატიული, ერთიანი საქართველოსთვის" შესრულებას, რამაც უნდა უზრუნველყოს მოსახლეობის სოციალური დაცვა და ქვეყნის ეკონომიკური განვითარება.
სხდომაზე შენიშვნები გამოითქვა განათლებისა და მეცნიერების სამინისტროს დაფინანსებასთან დაკავშირებით. ფინანსთა მინისტრის განმარტებით, წარმოდგენილი პროექტი არის 2015 წლის ბიუჯეტის პროექტის პირველადი ვარიანტი და მის გადამუშავებაზე ოქტომბრის განმავლობაში აქტიური მუშაობა გაგრძელდება, როგორც სამინისტროებთან, ასევე პარლამენტის შესაბამის კომიტეტებთან.
