საპარლამენტო უმრავლესობის წევრები თბილისის მერიის მაღალჩინოსნებისთვის სახელფასო დანამატის დამტკიცებას დადებითად მიიჩნევენ. როგორც ჟურნალისტებთან ,,ქართული ოცნების" წევრმა გიორგი ვოლსკიმ განაცხადა იმ პასუხისმგებლობიდან გამომდინარე, რაც თანამდებობის პირებს აქვთ, აღნიშნული გადაწყევტილება მისაღებია.
,, ასეთ მაღალ დონეზე ჩინოვნიკს, მითუმეტეს როცა ამხელა თანხებთან აქვს საქმე არა თუ არ ვენდობით, მაგრამ უნდა ჰქონდეს ღირსეული ანაზღაურება, რათა იმუშაოს იმ ენერგიით რომელსაც მისგან მოითხოვენ", _განაცხადა ჟურნალისტებთან ვოლსკიმ.
შეგახსენებთ, რომ თბილისის მერის დავით ნარმანიას განკარგულებით, მერიის მაღალჩინოსნები სექტემბრიდან სახელფასო დანამატებს იღებენ.
ბრძანებულების მიხედვით, დანამატის ჯამური რაოდენობა ოთხი თვის განმავლობაში 152 ათას ლარს შეადგენს.
აღნიშნული თანხა 26-ს ადამიანზე ნაწილდება. სიაში არიან მერის მოადგილეები, ადმინისტრაციის ხელმძღვანელები, აპარატის უფროსები. თუმცა მათ შორის არ არის თავად დედაქალაქის მერი დავით ნარმანია.
განკარგულების თანახმად, დანამატს მერიის თანამშრომლები წლის ბოლომდე აიღებენ.
აღნიშნულთან დაკავშირებით, მერიაში ჯერჯერობით განმარტება არა გაკეთებულა.