საგარეო საქმეთა მინისტრი მაია ფანჯიკიძე ნატო-ს გენერალური მდივნის იენს სტოლტენბერგის მიერ გაკეთებულ განცხადებას ეხმიანება და მას მნიშვნელოვანს უწოდებს.
,,ჩემთვის ძალიან მნიშვნელოვანია ნატო-ს გენერალური მდივნის ის განცხადება, რომელშიც იგი ამბობს, რომ აღმოსავლეთ პარტნიორობის ქვეყნებს შეუძლიათ ჰქონდეთ პარტნიორობის იმედი, რომ ისინი დაცულები იქნებიან. ამ წინადადების ინტერპრეტირება ბევრი მიმართულებით შეიძლება, ახლა ამ ინტერპრეტაციებისგან თავს შევიკავებდი, მაგრამ ნატო-ს გენერალური მდივნის დადებითი განწყობა აღმოსავლეთ პარტნიორობის ქვეყნებისადმი და, მათ შორის, რასაკვირველია იგულისხმება საქართველო, არის ძალიან კარგი. ჩვენ ჯერ არ გვქონია მასთან შეხვედრის საშუალება, იმედი მაქვს, რომ ეს საშუალება მალე მოგვეცემა და უფრო მეტ კონკრეტიკას მივიღებთ ნატო-ს ახალი გენერალური მდივნისგან", - განაცხადა მაია ფანჯიკიძემ.
ნატო-ს გენერალური მდივნის იენს სტოლტენბერგის განცხადებით, ალიანსი საკუთარ ჯარებს განათავსებს ყველგან, სადაც კი მოესურვება. ამის შესახებ, იენს სტოლტენბერგმა პოლონეთში ვიზიტისას, ადგილობრივ ტელევიზიასთან საუბრის დროს განაცხადა.