ევროსაბჭოს რეზოლუცია თბილისის ყოფილი მერის, გიგი უგულავასა და თავდაცვის ყოფილი მინისტრის დავით კეზერაშვილის საქმეს მტკიცებულებად დაერთო. აღნიშნულის გადაწყვეტილება მოსამართლე ლაშა ჩხიკვაძემ დაცვის მხარის შუამდგომლობის საფუძველზე მიიღო.
ადვოკატების განცხადებით, მათი დაცვის ქვეშ მყოფების საქმეში ევროსაბჭოს რეზოლუციის მტკიცებულებად დართვა ხელს შეუწყობდა ობიექტური გამოძიების ჩატარებას, ხოლო ბრალდების მხარეს განსხვავებული პოზიცია ჰქონდა და აცხადებდნენ, რომ რეზოლუცია სარეკომენდაციო ხასიათისაა და კეზერაშვილისა და უგულავას საქმესთან უშუალო შემხებლობა არ აქვს. თუმცა მოსამართლემ არ გაიზიარა პროკურატურის პოზიცია და დაცვის მხარის შუამდგომლობა დააკმაყოფილა.
მოსამართლის განცხადებით, დოკუმენტი უშუალო შემხებლობაში საქმესთან არ არის, თუმცა ირიბად უკავშირდება ბრალდებულებს. როგორც მოსამართლე ლაშა ჩხიკვაძემ განაცხადა რეზოლუცია დოკუმენტი საკმაოდ გავლენიანი ორგანიზაციის მიერ არის მიღებული და ვინაიდან უშუალოდ არიან ნახსენები ბრალდებულები, არ არსებობს წინაპირობა რომ იგი საქმეს არ დაერთოს.
შეგახსენებთ, რომ თბილისის საქალაქო სასამართლოში თბილისის ყოფილი მერის, გიგი უგულავას და თავდაცვის ყოფილი მინისტრის დავით კეზერაშვილის საქმის არსებითი განხილვა განახლდა.
საქმე ე.წ. "თბილსერვის ჯგუფის" ეპიზოდს შეეხება.
გამოძიება უგულავას დიდი ოდენობით საბიუჯეტო თანხების გაფლანგვას ედავება. საუბარია "თბილისერვის ჯგუფში" პარტიული მიზნებისთვის "ნაციონალური მოძრაობის" აქტივისტების ფიქტიურ დასაქმებაზე.
