პოლიტიკური რეპრესიების მსხვერპლთა და რეპრესირებულთა კომპენსაცია 1000-2000 ლარით განისაზღვრება. აღნიშნული ცვლილება შედის „საქართველოს მოქალაქეთა პოლიტიკური რეპრესიების მსხვერპლად აღიარებისა და რეპრესირებულთა სოციალური დაცვის შესახებ" საქართველოს კანონში, რომლის მიხედვით დადგინდება კომპენსაციის ზედა და ქვედა ზღვარი. ცვლილებას დღეს, პარლამენტის იურიდიულ საკითხთა კომიტეში განიხილავენ.
დღეისთვის კომპენსაციის ოდენობა მერყეობს 200-დან 500 ლარამდე. კანონპროექტის ავტორების განმარტებით, ევროპული სასამართლოს პრეცედენტული სამართლის გათვალისწინებით, კომპენსაციის ასეთი ოდენობა ვერ ჩაითვლება გონივრულად და ვერ უზრუნველყოფს ევროპული სასამართლოს გადაწყვეტილების სრულფასოვან აღსრულებას.
ამავე კანონში შესატანი ცვლილების მიხედვით, სარჩელების განხილვის უფლება ენიჭება ქუთაისის საქალაქო სასამართლოსაც. დღეს ეს უფლებამოსილება მხოლოდ თბილისის საქალაქო სასამართლოს აქვს. ახალი ნორმით, თბილისის საქალაქო სასამართლოს იურისდიქცია გავრცელდება აღმოსავლეთ საქართველოზე, ხოლო ქუთაისის საქალაქო სასამართლოს იურისდიქცია - დასავლეთ საქართველოზე.
კანონპროექტის მიხედვით, რეპრესირებული პირი, მისი პირველი რიგის მემკვიდრე ან მათი წარმომადგენელი, საცხოვრებელი ადგილის მიხედვით სარჩელს ფულადის კომპენსაციის მიღების შესახებ, წარუდგენს თბილისის ან ქუთაისის საქალაქო სასამართლოს არაუგვიანეს 2018 წლის 1 იანვრისა. დღეს მოქმედი რედაქცია ითვალისწინებს სარჩელის შეტანას არაუგვიანეს 2014 წლის 1 იანვრისა. რადგან ეს ვადა არ იყო საკმარისი პროექტის მიღების შემთხვევაში, რეპრესირებულ პირებს კვლავაც ექნებათ შესაძლებლობა მიმართონ სასამართლოს 2018 წლამდე.
პროექტით განისაზღვრა, რომ იმ რეპრესირებულ პირებს, რომლის მიმართაც თბილისის საქალაქო სასამართლომ უკვე გამოიტანა გადაწყვეტილება ამ კანონის ამოქმედებამდე, რომელთათვისაც კომპენსაციის თანხა მერყეობდა 200-დან 500 ლარამდე, უფლება აქვს, ხელახლა მიმართოს განსჯად სასამართლოს და მოითხოვოს ფულადი კომპენსაციის მიკუთვნება ამ კანონით დადგენილ ფარგლებში -1000-დან 2000 ლარამდე.
