დღეს, 24 სექტემბერს საქალაქო სასამართლოში სანდრო გირგვლიანის მკვლელობის საქმის განხილვა გაგრძელდება.
15:00 საათზე ჩანიშნულ პროცესზე ჯერ ბრალდების მხარე, შემდეგ კი დაცვის მხარე წარმოთქვამს დასკვნით სიტყვას.
მოსამართლე დავით მგელიაშვილი კი, განაჩენს, სავარუდოდ, ერთ კვირაში გამოაცხადებს.
საქმეში ბრალდებულ პირებს - ვანო მერაბიშვილს, დათა ახალაიას, გერონტი ალანიას, ვალერიან მეტრეველს და ოლეგ მელნიკოვს ბრალად ედებათ სამსახურებრივი უფლებამოსილების გადამეტება, არაადამიანური მოპყრობა, მტკიცებულებების ფალსიფიკაცია და თავისუფლების უკანონო აღკვეთა.
აღნიშნულ საქმეში ვანო მერაბიშვილს ბრალი ედება სანდრო გირგვლიანის საქმესთან დაკავშირებით სახელმწიფო პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენებით და სამსახურებრივი სიყალბისთვის დანაშაულის ჩადენა, გათვალისწინებული სისხლის სამართლის კოდექსის 332-ე და 341-ე მუხლებით.
ოლეგ მელნიკოვს ბრალად ედება თავისუფლების უკანონო აღკვეთა და სამსახურეობრივი უფლებამოსილების გადამეტება. დანაშაული გათვალისწინებულია სისხლის სამართლის კოდექსით 143-ე და 333-ე მუხლებით. გერონტი ალანიასა და ვალერიან მეტრეველის კი ბრალად ედებათ ვამეხ აბულაშვილისა და კახა დაბრუნდაშვილის თავისუფლების უკანონო აღკვეთა და მათ მიმართ დამამცირებელი და არაადამიანური მოპყრობა, რაც გათვალისწინებულია სისხლის სამართლის კოდექსის 143-ე, 144-3, 332, 333 და 341-ე მუხლებით.
წაყენებული ბრალდებები 9-დან 15 წლამდე პატიმრობას ითვალისწინებს.
