საქართველოს ყოფილი პრეზიდენტის ქონების შემდეგ მისი საბანკო ანგარიშები დააყადაღეს. ამის შესახებ, ინფორმაციას სოციალურ ქსელში სააკაშვილის ადვოკატი ოთარ კახიძე ავრცელებს.

,,ბატონი ბიძინას ლოცვა-კურთხევით, დაყადაღებულია მიშა სააკაშვილის საბანკო ანგარიშები. ოღონდ, პროკურატურას დაეზარა იმის გარკვევა, თუ რომელი ბანკის მომსახურებით სარგებლობდა ექს-პრეზიდენტი და მოითხოვა ყველა ბანკში ყადაღის დადება, აი ასე, თუკი სადმე რამე აქვს. :) სასამართლომაც დაარტყა ბეჭედი. ამ ნაკვეთებზე რაღატო იწვალეს, არ ვიცი. დაეყადაღებინათ ზოგადად - "ყველაფერი":) მადლობა იმ ბრძენ კაცს, კანონის უზენაესობა რომ დაამკვიდრა", _აცხადებს კახიძე.

შეგახსენებთ, რომ 19 სექტემბერს მიხეილ სააკაშვილისა და მისი ოჯახის ქონებება დააყადაღეს. როგორც პროკირატურის მიერ გავრცელებულ განცხადებაშია აღნიშნული ,, საქართველოს ყოფილ პრეზიდენტს მიხეილ სააკაშვილს ბრალად ედება სახელმწიფო ბიუჯეტის კუთვნილი 8 837 461.34 ლარის გაფლანგვა, რითაც მან სახელმწიფოს მიაყენა დიდი ოდენობით მატერიალური ზიანი. ვინაიდან, ბრალდებული მიხეილ სააკაშვილი თავს არიდებს გამოძიებას, არსებობდა დასაბუთებული ვარაუდი, რომ მოსალოდნელი ქონებრივი პასუხისმგებლობისგან თავის არიდების მიზნით, იგი გაასხვისებდა ან სხვაგვარად გადამალავდა მისი და მასთან დაკავშირებული პირების სახელზე რიცხულ ქონებას, რაც ხელს შეუშლიდა სახელმწიფოსთვის მიყენებული ზიანის ანაზღაურებას. ამ მიზნით, პროკურატურის შუამდგომლობის საფუძველზე, თბილისის საქალაქო სასამართლოს 29 აგვისტოსა და თბილისის სააპელაციო სასამართლოს 03 სექტემბრის განჩინებებით, ყადაღა დაედო ბრალდებულ მიხეილ სააკაშვილისა და მასთან დაკავშირებული პირების უძრავ-მოძრავ ქონებას.კერძოდ:მიხეილ სააკაშვილის საკუთრებაში არსებულ ქონებას: 1) ქ. ყვარელში მდებარე 2 332 კვ.მ. სასოფლო-სამეურნეო დანიშნულების მიწის ნაკვეთს2) ქ.ყვარელში მდებარე 1 316 კვ.მ. სასოფლო-სამეურნეო დანიშნულების მიწის ნაკვეთს.3) ქ.ყვარელში მდებარე 2 441 კვ.მ. სასოფლო-სამეურნეო დანიშნულების მიწის ნაკვეთს4) ქ.ყვარელში მდებარე 1 207 კვ.მ. სასოფლო-სამეურნეო დანიშნულების მიწის ნაკვეთს. 5) ქ. ყვარელში მდებარე 6 820 კვ.მ. სასოფლო-სამეურნეო დანიშნულების მიწის ნაკვეთს 97 კვ.მ. შენობა ნაგებობით. 6) ქ. ყვარელში მდებარე 682 კვ.მ. სასოფლო-სამეურნეო დანიშნულების მიწის ნაკვეთს7) ქ.ყვარელში მდებარე 1 668 კვ.მ. სასოფლო-სამეურნეო დანიშნულების მიწის ნაკვეთს8) ქ. ყვარელში მდებარე 2 637 კვ.მ. სასოფლო-სამეურნეო დანიშნულების მიწის ნაკვეთს.9) HONDA ACCORD-ის მარკის ავტომანქანას, (გამოშვების წელი 1988). სანდრა რულოვსის საკუთრებაში არსებულ ქონებას: ქ. თბილისში, ბარნოვის N9-ში მდებარე 154 კვ.მ. ბინას და 164 კვ.მ. მანსარდას.გიული ალასანიას საკუთრებაში არსებულ ქონებას და წილს საწარმოში:1) ქ. ყვარელში მდებარე 1 313 კვ.მ, 251 კვ.მ, 334 კვ.მ სასოფლო-სამეურნეო დანიშნულების მიწის ნაკვეთებს.2) ქ. ბათუმში, ჭავჭავაძის ქუჩა N5-ში მდებარე 172.80 კვ.მ. ბინას3) შპს „იუჯი ბაღში" გიული ალასანიას საკუთრებაში არსებულ 50 %-იან წილს.მზია წერეთლის საკუთრებაში არსებულ ქონებას:1) ქ. თბილისში. ილია ჭავჭავაძის გამზ. N37-ში მდებარე 197 კვ.მ. მშენებარე ბინას. 2) ოზურგეთის რაიონის სოფელ ნატანებში მდებარე 500 კვ.მ. სასოფლო-სამეურნეო დანიშნულების მიწის ნაკვეთს. 3) TOYOTA RAV4 -ის მარკის ავტომანქანას (გამოშვების წელი 2010).ნიკოლოზ სააკაშვილის საკუთრებაში არსებულ ქონებას:TOYOTA LANDCRUISER LC 200-ის მარკის ავტომანქანას (გამოშვების წელი 2014). თბილისის საქალაქო სასამართლოს გადაწყვეტილება დაცვის მხარის მიერ გასაჩივრებული იქნა თბილისის სააპელაციო სასამართლოში, რაც არ დაკმაყოფილდა", _ნათქვამია განცხადებაში.