ბევრ პოსტსაბჭოთა ქვეყნის პრეზიდენტს მოუხიბლავს ამერიკელი პოლიტიკოსები თავისი დაპირებებით რეფორმების გატარებისა და დემოკრატიის მშენებლობის შესახებ, თუმცა ისინი იმედგაცრუებულები რჩებოდნენ
სტატიაში განხილულია უკრაინის პრეზიდენტის პეტრო პოროშენკოს ვიზიტი აშშ-ში და მისი გამოსვლა კონგრესში, ამერიკელი კანონმდებლების წინაშე („ნეიშენელ ინტერესთ" , ავტორი - რაიმონდ ზონტაგი, ეროვნული ინტერესების კვლევითი ცენტრის მეცნიერ-თანამშრომელი).
"ჯი-ეიჩ-ენი" გთავაზობთ ამონარიდს:
„უკრაინის პრეზიდენტი პეტრო პოროშენკო კონგრესის პალატების გაერთიანებულ სხდომაზე სიტყვით გამოვიდა. ეს ფაქტი წარმომადგენლობითი პალატის სპიკერმა ჯონ ბონერმა შეაფასა როგორც „კიდევ ერთი სიგნალი ჩვენი ერთგულებისა უკრაინელი ხალხის მისწრაფებისადმი".
ითვალისწინებს რა უკრაინის წინაშე მდგარ დიდ პრობლემებს, გასაგებია, რომ ბარაკ ობამას ადმინისტრაციას და კონგრესს სურს უკრაინის პრეზიდენტისადმი მხარდაჭერა გამოავლინოს. თუმცა ვაშინგტონი უფრო მეტ სიბრძნეს გამოაჩენდა, თუ გაიხსენებდა წარსულს და არ მოხვდებოდა პეტრო პოროშენკოს მსგავსი უცხოელი ლიდერების მხარდაჭერის ხაფანგში. ასეთი რამ პირველად არ მომხდარა - ბევრ პოსტსაბჭოთა ქვეყნის პრეზიდენტს მოუხიბლავს ამერიკელი პოლიტიკოსები თავისი დაპირებებით რეფორმების გატარებისა და დემოკრატიის მშენებლობის შესახებ, თუმცა [საბოლოო ჯამში ისინი] იმედგაცრუებულები რჩებოდნენ: ჩვენ უკვე გვაქვს გამოცდილება რუსი ბორის ელცინის, ქართველების - ედუარდ შევარდნაძისა და მიხეილ სააკაშვილის, კიდევ ერთი უკრაინელის - ვიქტორ იუშჩენკოს გამოსვლებთან დაკავშირებით (სხვათა შორის, ვიქტორ იუშჩენკოც კონგრესის გაერთიანებულ სხდომაზე გამოვიდა 2005 წელს). ახლა ჩვენ უნდა დავფიქრდეთ: თუ შეერთებულ შტატებს ნამდვილად სურს უკრაინელებისათვის დახმარების გაწევა, მაშინ ვაშინგტონმა ქვეყნის მიმართ დახმარების რეალური და ეფექტური სტრატეგია უნდა შეიმუშავოს და არა უბრალოდ მოქმედების კარტ-ბლანში მისცეს ისეთ პრობლემურ ლიდერს, როგორიც პეტრო პოროშენკოა. მისი წარსული კარგადაა ცნობილი და ეს კონგრესს უნდა ახსოვდეს".
სტატიაში გაანალიზებულია პეტრო პოროშენკოს ბიოგრაფია: როგორ გახდა მდიდარი სახელმწიფო ქონების შეძენით და როგორ იყენებდა ამ სიმდიდრეს პოლიტიკური კარიერისათვის, როგორ მიიღო მონაწილეობა რეგიონების პარტიის შექმნაში, ეხმარებოდა პრეზიდენტ ლეონიდ კუჩმას (მოგვიანებით კი ვიქტორ იანუკოვიჩს), როგორ გაწყვიტა კავშირი რეგიონების პარტიასტან და ვიქტორ იუშჩენკოს მხარეს გადავიდა (მის საპრეზიდენტო კამპანიას აფინასებდა), შემდეგ კი კი ისევ იანუკოვიჩის მთავრობაში ეკონომიკის მინისტრად მუშაობდა...
„როცა პოროშენკოს გამოსვლით გამოწვეული აპლოდისმენტები ჩაცხრება და ჟურნალისტები მის ფოტოსესიას დაასრულებენ, ამერიკელმა პოლიტიკოსებმა კარგი იქნება იმაზეც იფიქრონ, რომ უკრაინის დახმარებისას აშშ-ის ეროვნულ ინტერესებიც უნდა გაითვალისწინონ", - ნათქვამია სტატიის დასასრულს.