საგარეო საქმეთა მინისტრი მაია ფანჯიკიძე გაეროში კლიმატის ცვლილებების სამიტზე პრეზიდენტ გიორგი მარგველაშვილის მიწვევის შესახებ განმარტებას აკეთებს და აცხადებს, რომ თავდაპირველად მოწვევა არა მარგველაშვილის, არამედ ყოფილი პრეზიდენტის მიხეილ სააკაშვილის სახელზე მიიღეს.
,,25 თებერვლით დათარიღებული მოწვევა მხოლოდ კლიმატის სამიტზე საქართველოს მისიამ 14 მარტს მიიღო და ეს მოწვევა მიხეილ სააკაშვილის სახელზე იყო. ესეც აჩვენებს იმას რამდენად ფორმალურია ეს მოწვევა. როდესაც მისიამ ინფორმაცია გაუგზავნა გაეროს იმის თაობაზე, რომ საქართველო პრეზიდენტი გიორგი მარგველაშვილი იყო, ამას კიდევ დასჭირდა რამდენიმე კვირა და 30 მაისს მიიღო საგარეო უწყებამ ახალი მოწვევა უკვე მარგველაშვილის სახელზე, რომელიც მას 5 ივნისს გადაეგზავნა. Aანუ სულ რამდენიმე დღეში", _განაცხადა ფანჯიკიძემ არაბთა გაერთიანებულ საიმიროებში სტუმრობისას.
შეგახსენებთ, რომ გაეროს გენერალურმა მდივანმა ბან კი მუნმა საქართველოს პრეზიდენტის გიორგი მარგველაშვილის სახელზე გაეროს კლიმატის ცვლილებების სამიტში მონაწილეობასთან დაკავშირებით მოწვევა თებერვალში გამოაგზავნა, ხოლო საგარეო უწყებამ ამის შესახებ მარგველაშვილს ივნისში აცნობა. ამის შესახებ, ინოფმაციას ,,რუსთავი-2" ასაჯაროვებს.
ტელეკომპანიის ცნობით, გაეროს გენერალურმა მდივანმა ბან კი მუნმა გიორგი მარგველაშვილის სახელზე ოფიციალურად და პერსონალურად მოწვევა 25 თებერვალს გამოაგზავნა, საგარეო უწყებამ კი ამის შესახებ პრეზიდენტის ადმინისტრაციას ორი თვის დაგვიანებით, 11 ივნისს აცნობა, როცა ჯერ კიდევ ადმინისტრაციის ხელმძღვანელი ლაშა აბაშიძე იყო.
ამის შემდეგ პრეზიდენტმა დაუდასტურა ოფიციალური წერილით, რომ ის აპირებდა მოწვევის მიღებას და გაეროში კლიმატის ცვლილებების სამიტზე წასვლას, რის შემდეგაც მან 8 ივლისს მიიღო საგარეო უწყებიდან პასუხი, რომ ორივე ღონისძიებაზე გაეროში გაემგზავრებოდა საქართველოს პრემიერ-მინისტრი.
ტელეკემპანიის ინფორმაციით, ამის შემდეგ პრეზიდენტის მრჩეველმა თენგიზ ფხალაძემ ოფიციალური წერილით მიმართავდა საგარეო უწყებას, სადაც განმარტა თუ რა ფუნქციები აქვს პრეზიდენტს და რომ მას აქვს უფლება მიიღოს მონაწილეობა ამ ტიპის ღონისძიებაში, რის შემდეგად თენგიზ ფხალაძემ დავით ზალკალიანისგან მიიღო ასევე ოფიციალური წერილი, სადაც ეწერა, რომ 14 ივლისს გამართულ მთავრობის სხდომაზე გადაწყვეტილება მიიღეს და გაეროში პრემიერი გაემგზავრებოდა.
ამის შემდეგ, ფხალაძემ 14 აგვისტოს საგარეო უწყებას მიმართა, ითხოვდა დახმარებას საგარეო საქმეთა სამინისტროსგან, რომ შემდგარიყო პრეზიდენტის ვიზიტი შეერთებულ შტატებში და უხსნიდა პრეზიდენტის როლს საგარეო ურთიერთობებში. ბოლო წერილი საგარეო უწყებაში 8 სექტემბერს შევიდა, სადაც ფხალაძე, ასევე, ითხოვდა პრეზიდენტის ვიზიტის უზრუნველყოფას, თუმცა 12 სექტემბერს პრეზიდენტმა მარგველაშვილმა აღნიშნული ვიზიტი ჩაშლილად გამოაცხადა.
