იურისტი თამარ გურჩიანი მიიჩნევს, რომ პრეზიდენტსა და მთავრობას შორის დაპირისპირება უკვე გასართობ საგნად იქცა. როგორც ,,ჯი-ეიჩ-ენთან" საუბარში გურჩიანი აცხადებს ყველა ვალდებულია დაემორჩილოს კონსტიტუციას.
,,მართალი გითხრათ დიდი სურვილი არ მაქვს ამ თემაზე კომენტარის გაკეთების, რადგან საკითხი იმდენად სამართლებრივი არ არის რამდენადაც ეთიკური პრობლემაა. რა თქმა უნდა, საკითხები თუ უფრო მკაფიო გახდება და ქვეყანა რეალურ საპარლამნეტო მოდელზე გადავა კარგი იქნება, მაგრამ იქამდე კონსტიტუცია რასაც ამბობს იმას უნდა ვცეთ პატივი და იმას მთავრობა პატივს არ სცემს. პირადად არ ვარ არც კატაფუნიის მომხრე, რომ მთავრობის ყველა წევრი და პრეზიდენტი სხვადასხვა რამეს ამბობდეს, მაგრამ არც იმის მომხრე ვარ რომ ერთ ხმაში საუბრობდნენ. ამიტომ სახელმწიფოებრივი აზროვნების საგანი სწორედ ის არის რამდენად შეძლებენ ბალანსის დაცვას და რამდენად გასართობ თემად არ აქცევენ მთავრობასა და პრეზიდენტს შორის კინკლაობას. მე მგონია, რომ ეს საკითხი გასართობ თემად იქცა, მაშინ როცა ქვეყანაში მილიონობით პრობლემაა რომელთაც პატივი არ ხვდათ მათზე ფართო დისკუსიები გაიმართოს", _განაცხადა გურჩიანმა ,,ჯი-ეიჩ-ენთან" საუბარში.