სომხური გამოცემა „ლრაგირი" აქვეყნებს სტატიას, რომელშიც მიმოხილულია ამერიკის შეერთებული შტატების თავდაცვის მინისტრის ჩაკ ჰეიგელის ვიზიტი საქართველოში, მისი ანტირუსული განცხადებები და დაპირებები საქართველოს ხელისუფლების მიმართ. ამ ფონზე მოკლედაა გაანალიზებული სამხრეთ კავკასიაში შექმნილი სიტუაციაც (ავტორი ნაირა აირუმიანი).
„ჯი-ეიჩ-ენი" გთავაზობთ ამონარიდს სტატიიდან :
„ჩაკ ჰეიგელის ვიზიტის შემდეგ რუსულ მასმედიაში უკვე გაჩნდა მასალები, რომელთა თანახმად, დასავლეთისა და რუსეთის დაპირისპირების ცენტრმა შეიძლება სამხრეთ კავკასიაში გადმოინაცვლოს. საინტერესოა, რომ სანამ თბილისში პენტაგონის შეფი იმყოფებოდა და საქართველოს „დასავლეთის სამხედრო ფორპოსტად" გადაქცევას პირდებოდა, ბაქოში ევროკავშირისა და „აღმოსავლეთის პარტიორობის" ქვეყნების (სომხეთის გარდა) ენერგეტიკის მინისტრები შეიკრიბნენ. ამ ღონიისძიებით ბრიუსელმა ბაქოს მიანიშნა, რომ ევროპა აზერბაიჯანს „ენერგეტიკულ ფორპოსტად" მიიჩნევს.
ასეთი მოვლენების ფონზე შეიძლება ვინმეს მოეჩვენოს, რომ სომხეთი დასავლეთის გეგმებიდან საერთოდ ამოვარდა და მხოლოდ „რუსეთის ფორპოსტად" განიხილება, თუმცა ფაქტები სხვა რამეს მიუთითებენ: სომხეთი დასავლეთისთვის შეიძლება გეოსტრატეგიულ ფორპოსტად იქნეს განხილული, თანაც რამდენიმე ფუქნციით - თურქეთისა და აზერბაიჯანის შემაკავებლად, ირანთან დამაკავშირებელ ქვეყნად და იმ სახელმწიფოდ, რომელსაც ბირთვული პოტენციალი აქვს.
მაგრამ მთავარი ისაა, რომ სომხეთის ტერიტორიაზე რუსული სამხედრო ბაზა არსებობს - თითქოსდა ამით ერევანმა მოსკოვს თავისი უსაფრთხოების დაცვა ჩააბარა, მაგრამ, როგორ უცნაურადაც არ უნდა მოგვეჩვენოს, ამ ბაზით სომხეთი რუსული ექსპანსიის წინააღმდეგ მიმართულ მთავარ ფორპოსტს წარმოადგენს.
სომხეთის ევრაზიული ინტეგრაციის გზაზე საქართველო ძლიერ დაბრკოლებად აღიქმება. თბილისი (და, სხვათა შორის, ანკარაც) რუსეთის თვითმფრინავებს თავიანთი საჰაერო სივრცით სარგებლობის ნებას არ აძლევენ. საქართველო არ ახდენს არავითარ რეაგირებას სომხეთის წინადადებაზე „ზემო ლარსის" საკონტროლო-გამშვებ პუნქტთან გვირაბის მშენებლობის თაობაზე, რის შედეგადაც, ფაქტიურად, სომხეთ-რუსეთის ტვირთების გადაზიდვა შეიძლება ნახევარი წლით შეწყდეს. სომხეთის ხელისუფლება მაინც და მაინც არ ცდილობს „ქართული ბარიერის" განეიტრალებას და ინტერესით აკვირდება, თუ როგორ მოაგვარებს რუსეთი საქართველოს საკითხს. მით უმეტეს, რომ ევრაზიული სივრცე უკვე ნაკერებზე იხევა - ბელარუსი რუსეთთან სასაზღვრო რეჟიმს აწესებს, ყაზახეთში კი უკვე ევრაზიული კავშირიდან გამოსვლაზე ალაპარაკდნენ. სომხეთის მთავრობამ, როგორც ჩანს, ლოდინის რეჟიმი აირჩია.... მაგრამ 10 ოქტომბრამდე (ევრაზიულ კავშირში სომხეთის ოფიციალურ მიღებამდე) მხოლოდ ერთი თვეღა დარჩა".