აშშ-ის რადიოსადგურ „თავისუფლების" რუსულენოვანი სამსახურის ეთერით („სვობოდა" // ეხო კავკაზა") გადაიცა ინტერვიუ რუს პოლოტილოგ სტანისლავ ბელკოვსკისთან, რომელშიც მან უკრაინის დრამატულ მოვლენებზე და ამ მოვლენებში რუსეთის დესტრუქციულ როლზე ისაუბრა. ინტერვიუში სტანისლავ ბელკოვსკიმ საქართველო-რუსეთის ურთიერთობებზე და თბილისის ევროატლანტიკური ინტეგრაციის კურსზეც იმსჯელა.
„ჯი-ეიჩ-ენი" გთავაზობთ ამონარიდს:
„უკრაინის მოვლენების ფონზე ვლადიმერ პუტინი საქართველოს ერთგვარ ნიმუშად და იდეალად მიიჩნევს, თუ როგორ შეიძლება მისი გეგმების რეალიზება პოსტსაბჭოთა სივრცეში. ვლადიმერ პუტინმა ჯერ აფხაზეთისა და სამხრეთ ოსეთის სახით ბუფერული ზონა შექმნა და მათი რუსეთთან ურთიერთობის ლეგალიზება მოახდინა, დამოუკიდებლობის აღიარების მეშვეობით, შემდეგ მიაღწია აგრესიული და ანტირუსულად განწყობილი მიხეილ სააკაშვილის საქართველოს ხელისუფლებიდან წასვლას და ხელი შეუწყო (როგორც მას მიაჩნია), ხელისუფლებაში ბორის ივანიშვილის კლანის მოსვლას, რომელიც მართალია, პრორუსულ პოლიტიკოსად არ ითვლება, მაგრამ იმავდროულად არ იზიარებს აგრესიულ ანტირუსულ პოზიციას. მე ვფიქრობ, რომ ვლადიმერ პუტინი უკრაინის, მოლდოვისა და სხვა მეზობელი ქვეყნების მიმართაც იგივე ტაქტიკის რეალიზებას შეეცდება. ყველა შემთხვევაში ეს რუსეთის იმპერიის არსებობის შეწყვეტას მიუთითებს: მოსკოვი უკვე ყოფილი იმპერიის აღდგენას კი არ ცდილობს, [არამედ გადართულია ყოფილი საბჭოთა კავშირის ტერიტორიული სივრცის აღდგენაზე] და იმ რესპუბლიკების დაბრუნებას ცდილობს, რომლებიც შემთხვევით აღმოჩნდნენ ყოფილი საბჭოთა სივრცის ფარგლებს გარეთ.
რაც შეეხება საქართველოს ევროატლანტიკურ ინტეგრაციას, მე ვფიქრობ, რომ ეს პროცესი გაგრძელდება. მე კრემლის დოქტრინის წარმატება არ მჯერა. საქართველოს, მოლდოვას და უკრაინას ნატოში გაწევრიანების პერსპექტივა ნამდვილად აქვთ, თუმცა პუტინისეული რუსეთი ყველანაირად შეეცდება მის დამუხრუჭებასა და ხელის შეშლას. ამიტომაც ეს გარემოება ძალიან საშიშ და სახიფათო რეალობად უნდა მივიჩნიოთ".
