თბილისში საპატრულო პოლიციის თანამშრომლებმა რამდენიმე ადამიანის სიცოცხლე გადაარჩინეს.
როგორც შსს-ს საზოგადოებასთან ურთიერთობის დეპარტამენტის ხელმძღვანელი ნინო გიორგობიანი facebook-ში საკუთარ გვერდზე წერს გორგასლის ქუჩაზე საპატრულო პოლიციის ეკიპაჟს დიდი სიჩქარით მომავალმა ჯიპმა ჩაუარა, ეკიპაჟის თვალწინ ავტომანქანა გზის საპირისპირო ზოლში გადავიდა, ხეს შეეჯახა და მანქანის ძარას ცეცხლი წაეკიდა.
„ავტომანქანაში 4 ადამიანი იმყოფებოდა. ეკიპაჟის წევრები ეკა ერაძე და მისი მეწყვილე ლევან შენგელია სწრაფად მივიდნენ ავტომანქანასთან სადაც 3 მგზავრი უგონო მდგომარეობაში დახვდათ. ეკა წინა კარის გახსნას შეეცადა, თუმცა ის შეჯახების შედეგად დეფორმირებული იყო. მან ჯერ სალონის უკანა სავარძელზე მყოფი ორი დაშავებული მოქალაქე გადმოიყვანა, ხოლო შემდეგ წინა კარის ფანჯრიდან მეწყვილესთან ერთად შეძლო უგონოდ მყოფი მოქალაქის გამოყვანა. საპატრულო პოლიციის თანამშრომლებმა სამივე მგზავრის გადარჩენა მოახერხეს და ისინი საავადმყოფოში გადაიყვანეს", - წერს ნინო გიორგობიანი.
