2014 წლის 25 აგვისტოს საქართველოს სახალხო დამცველს მოქალაქე გიორგი ცომაიას მიმართ პოლიციელების მხრიდან შესაძლო ცემის ფაქტის შესწავლის თხოვნით მიმართა ადამიანის უფლებათა ცენტრმა. გარემოებების სრულყოფილად შესწავლის მიზნით, საქართველოს სახალხო დამცველის რწმუნებულმა სასჯელაღსრულების დეპარტამენტის #8 დაწესებულებაში ბრალდებული გიორგი ცომაია მოინახულა. ცომაიამ დაადასტურა იმ გარემოებების უტყუარობა, რომელიც საქართველოს სახალხო დამცველს ადამიანის უფლებათა ცენტრმა წარუდგინა.
საქართველოს სახალხო დამცველი გიორგი ცომაიას საქმეში არსებული ფაქტების ურთიერთშეჯერების შედეგად, კანონმდებლობით მინიჭებული უფლებამოსილების ფარგლებში, განახორციელებს შესაბამის სამართლებრივ რეაგირებას. აღნიშნული საქმის შესწავლის შედეგებს საქართველოს სახალხო დამცველი მოგვიანებით გააცნობს საზოგადოებას. მოცემულ ეტაპზე საქართველოს სახალხო დამცველი მოუწოდებს სამართალდამცავ ორგანოებს აწარმოონ ეფექტიანი გამოძიება გიორგი ცომაიას მიმართ პოლიციელების მხრიდან განხორციელებული შესაძლო არასათანადო მოპყრობის ფაქტზე.
