თუ ასე აპირებენ ყოფილი პრეზიდენტის დაპატიმრებას და პასუხისმგებლობის დაკისრებას, ეს არ გამოვა, - აცხადებს გაზეთ "პრემიერისთვის" მიცემულ ინტერვიუში უფლებადამცველი ლია მუხაშავრია. მისი თქმით, მიხეილ სააკაშვილისთვის კიბე-კიბე ხდება ახალი ბრალდებების წაყენება, "მაშინ, როდესაც არავინ კალთებს არ აგლეჯს პროკურატურას, რომ ყველა მტკიცებულება მოაგროვოს, ყველა ბრალდება ჩამოაყალიბოს და ბრალი მერე წაუყენოს".
უფლებადამცველი ამბობს, რომ ამის მიზეზი ხელისუფლების მიმართ საზოგადოების დაბალი მხარდაჭერაა, რომელიც არჩევნების პროცესში ხელისუფლებამ კარგად დაინახა.
"ყველა ახსენებდა მათ დანაპირების შეუსრულებლობას სამართლიანობის აღდგენასთან დაკავშირებით. ამიტომ ხელისუფლებას თვლაში ნაცრის შეყრის მსგავსად უნდა შექმნას ვითარება, თითქოს მიხეილ სააკაშვილს დასაჭერად მისდევს. თუ ასე აპირებენ ყოფილი პრეზიდენტის დაპატიმრებას და პასუხისმგებლობის დაკისრებას, ეს არ გამოვა. ნუ დაგვავიწყდება, რომ ის საქმეები, რომელიც ვანო მერაბიშვილისა და ბაჩანა ახალაიას მიმართაა წარმოებული, არ არის დამაჯერებელი და საკმარისად სამართლიანი. ასევე, გავიხსენოთ, რა ბედი ეწიათ ე.წ. "ციხის მწამებლებს", როგორ მსუბუქად და იოლად გადაურჩენენ ისინი მართლმსაჯულებას. ამიტომ მე არ ვფიქრობ, რომ ეს პროცესი საერთოდ სამართლიანობის აღდგენას ემსახურება და შესაბამის შედეგს მოიტანს. სამართლიანობის აღდგენა არა მხოლოდ დამნაშავის იდენტიფიცირების მოხდენას ნიშნავს, არამედ, პირველ რიგში, მსხვერპლის დარღვეული უფლებები უნდა აღდგეს. მხოლოდ ვანო მერაბიშვილისა და მიხეილ სააკაშვილის დაპატიმრებით დაზარალებულ პირებს დარღვეულ უფლებებს ვერ აღუდგენ. ასევე, არ ხდება სამართლიანობის აღდგენა იმ პირების მიმართ, რომლებიც პარლამენტმა პოლიტიკური ნიშნით დევნილად გამოაცხადა. სხვა ადამიანებს, სამწუხაროდ, იმედი უნდა გავუცრუოთ და ვუთხრათ, რომ ამ ხელისუფლებას არ აქვს პოლიტიკური ნება, მას აქვს მხოლოდ სურვილი, შექმნას ფონი, თითქოს რაიმეს აკეთებს სამართლიანობის აღსადგენად", - აცხადებს მუხაშავრია.
