სენატორებმა მომწერეს პირადი წერილი, მე ძალიან ბევრ პირად წერილს ვიღებ და არაეთიკურია, რომ ჩემი მხრიდან მოხდეს მათი გასაჯაროება, - განუცხადა საქართველოს პრემიერ-მინისტრმა ჟურნალისტებს, რომლებიც დაინტერესდნენ, რატომ არ გახდა საჯარო სენატორების მიერ ირაკლი ღარიბაშვილისთვის გამოგზავნილი წერილი.
მთავრობის მეთაურის თქმით, ამ თემაზე აჟიოტაჟი გაუგებარია, რადგან ხელისუფლების მუშაობის სტილი აბსოლუტურად გამჭვირვალეა.
„შესაძლოა, სენატორები არ თვლიდნენ საჭიროდ, რომ მათ მოწერილი წერილი ყოფილიყო საჯარო. თუ ისინი ამას საჭიროდ ჩათვლიდნენ, თავად გაასაჯაროებდნენ. რისი გამოქვეყნებაც საჭირო ყოფილა, მათზე საჯაროდ გვიპასუხია. რას ხედავთ ამაში უცნაურს, არ მესმის. სენატორებს უკვე გაეგზავნათ საპასუხო წერილი. ეს არის უფროსი მეგობრების რჩევა ჩვენი სახელმწიფოსთვის, მაგრამ მე მათ ავუხსენი, რომ წერილში მოყვანილი ინფორმაცია არ შეესაბამებოდა სიმართლეს. დიდი ალბათობით, ეს ფაქტები მიწოდებული იყო სააკაშვილის და მისი ლობისტების მიერ", - განაცხადა პრემიერმა.
მასალის გამოყენების პირობები
