აუცილებლად წამიყენებენ კიდევ 35 ბრალს, რომ შთაბეჭდილება მოახდინონ, - ამის შესახებ საქართველოს ყოფილმა პრეზიდენტმა მიხეილ სააკაშვილმა ვარშავაში განაცხადა და აღნიშნა, რომ საქართველოს მთავრობა სამართლებრივ სივრცეს დიდი ხანია ასცდა. ექსპრეზიდენტის კომენტარი "რუსთავი 2"-მა გაავრცელა.
"მე მაინც ვამაყობ იმით, რომ ამდენი ჩხრიკეს, ამდენი ქექეს, ბენზინის 1 ლარი, ბარკლების წილი, ბოლოს კაბინეტში როგორ ვიყიდე სკამები, ჩემი რამდენიმე თანამშრომელი დაკითხვაზე ჰყავდათ. ბოლოს ერთადერთი, რაც ამოქექეს, არის ირაკლი ოქრუაშვილის ჩვენება, რომელიც ჩვენ დავითხოვეთ კორუფციისა და ცრუპენტელობისთვის და ნინო ბურჯანაძის ჩვენება", - განაცხადა სააკაშვილმა და საქართველოს ხელისუფლებას ურჩია გამოართვან ჩვენება ჩახალიანს, რადგან იმასაც ბევრი რამ აქვს სათქმელი.
"შკრილნიკოვიც, რომელმაც ალბათ დატოვა ქვეყანა, თორემ ისიც მოუყვებოდა რაღაცეებს. გევორქიანმაც ალბათ დატოვა, თორემ ისიც იტყოდა რამეს. სერიოზულად როგორ შეიძლება ამაზე მსჯელობა?! მე მგონი საქართველოში ყველა ყველაფერს ხვდება და მსოფლიოში ხომ ყველა დიდი ხანია ყველაფერს ხვდება. ფაქტია, რომ დაგვცინიან. გადახედეთ მსოფლიოს. ყველა გაგიჟდა და მარტო ივანიშვილია საღ ჭკუაზე?! აუცილებლად წამიყენებენ კიდევ 35 ბრალს, რომ შთაბეჭდილება მოახდინონ, მაგრამ რომ ვერ ახდენს ივანიშვილი შთაბეჭდილებას ვერავიზე, ეგ როგორ ხდება?! პირიქით, რაც უფრო მეტს აკეთებს, მით უფრო მეტს ეცინება", - განაცხადა მიხეილ სააკაშვილმა.
