საგარეო საქმეთა მინისტრის მაია ფანჯიკიძის განცხადებით, დღეს დაგეგმილ უშიშროების საბჭოს სხდომაზე სექტემბერში დაგეგმილ უელსის სამიტზე განსახილველ საკითხებზე იმსჯელებენ.
,,უშიშროების საბჭო დანიშნულია იმის გამო, რომ სექტემბრის უელსის სამიტამდე დაახლოებით ერთი თვე დარჩა. ჩვენი დელეგაცია მასში მონაწილეობს და ის საკითხები, რომლებიც ჩვენ იქ მიგვაქვს და რასაც ველით, უნდა იქნეს განხილული. დელეგაციას უხელმძღვანელებს პრეზიდენტი და ბუნებრივია, ამ საკითხებზე იქნება საუბარი უშიშროების საბჭოზე", - განაცხადა ფანჯიკიძემ მთავარობის სხდომის დაწყებამდე.
შეგახსენებთ, რომ დღეს, 1-ელ აგვისტოს 15:00 საათზე, პრეზიდენტ გიორგი მარგველაშვილის მოწვევით, ეროვნული უშიშროების საბჭოს სხდომა გაიმართება. როგორც ,,ჯი-ეიჩ-ენს" უშიშროების საბჭოდან აცნობეს სხდომა საქართველოს მთავრობის ადმინისტრაციის შენობაში, მე-7 სართულზე გაიმართება.
დღის წესრიგით გათვალისწინებულია ნატო-ს უელსის სამიტისთვის მზადებასთან დაკავშირებული საკითხების განხილვა.