,,რუსეთის მიერ თავისუფალი ვაჭრობის შეთანხების შეჩერებით ზოგადად არაფერი დრამატული და ტრაგიკული არ მომხდარა", _განაცხადა სახელმწიფო მინისტრმა ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილმა.
მისვე თქმით, აღნიშნული ნაბიჯისთვის საქართველოს ხელისუფლება მზად იყო.
,,ყველაფერი ჩვენს მიერ იყო გათვლილი, გაანგარიშებული. მთავარი შედეგი მიღწეულია, დეესკალაცია არის ჩვენს რეგიონში. საუბარი მიდის ნორმალურ რეჟიმში მსოფლიო სავაჭრო ორგანიზაციის ფარგლებში სავაჭრო ურთიერთობების გაგრძელებაზე. შეიძლება ცალკეულ პროდუქციას შეეხოს ეს უშუალოდ, მაგრამ ზოგადად არაფერი დრამატული და ტრაგიკული არ მომხდარა. ხელისუფლებაც მზად იყო ამისთვის და საერთაშორისო თანამეგობრობასთანაც იყო მუშაობა, კონკრეტულად ევროკავშირთან", _განაცხადა პეტრიაშვილმა.
შეგახსენებთ, რომ რუსეთმა საქართველოსთან თავისუფალი ვაჭრობის შეთანხმება შეაჩერა. რუსული მედიის ინფორმაციით, რუსეთის ეკონომიკის სამინისტრომ რუსეთ-საქართველოს შორის თავისუფალი ვაჭრობის შესახებ შეთანხმების მოქმედების შეჩერების შესახებ დადგენილების პროექტი შეიმუშავა. რუსული მედიისვე ცნობით, ინფორმაციაში აღნიშნულია, რომ 18 ივლისს საქართველოს პარლამენტმა მოახდინა ევროკავშირთან ასოცირების შეთანხმების რატიფიცირება. ამ შეთანხმების უმეტესი პუნქტი, მათ შორის, ღრმა და ყოვლისმომცველი თავისუფალი ვაჭრობის შესახებ ძალაში 1-ელი სექტემბრიდან შედის. როგორც რუსეთის ეკონომიკის სამინისტროს პროექტშია აღნიშნული, ხელშეკრულების მოქმედების შეჩერება შეთანხმებულია რუსეთის საგარეო საქმეთა სამინისტროსთან, ეკონომიკის განვითარებისა და იუსტიციის სამინისტროებთან. შეგახსენებთ, რომ საქართველოსა და რუსეთს შორის თავისუფალი ვაჭრობის შეთანხმებას ხელი 1994 წლის 3 თებერვალს მოეწერა.