,,რუსეთის მიერ თავისუფალი ვაჭრობის შეთანხების შეჩერებით მგონია, რომ ტრაგიკული, ძალიან დიდი ფინანსური ზიანი საქართველოს არ ექნება", _განაცხადა ჟურნალისტებთან თავდაცვის მინისტრმა ირაკლი ალასანიამ.
მისივე თქმით, ორივე მხარე არის მსოფლიო სავაჭრო ორგანიზაციის წევრი შესაბამისად სწორედ ამ რეგულაციებით მოხდება ურთიერთობის გაგრძელება.
,,ორივე მხარე არის მსოფლიო სავაჭრო ორგანიზაციის წევრი. აქედან გამომდინარე ამ რეგულაციებით მოხდება ჩვენი ურთიერთობის გაგრძელება. მგონია, რომ ჩვენს პროდუქციას უფრო დიდი მომავალი აქვს და უფრი დიდი გასაღება ექნება ევროპულ ქვეყნებში. ასოცირების შეთანხმება სწორედ ამის საშუალებას მოგვცემს ორიენტირებული ვიყოთ ძირითად ახალ ბაზრებზე. მგონია, რომ ტრაგიკული, ძალიან დიდი ფინანსური ზიანი საქართველოს არ ექნება", - განაცხადა ალასანიამ.
შეგახსენებთ, რომ რუსეთმა საქართველოსთან თავისუფალი ვაჭრობის შეთანხმება შეაჩერა. რუსული მედიის ინფორმაციით, რუსეთის ეკონომიკის სამინისტრომ რუსეთ-საქართველოს შორის თავისუფალი ვაჭრობის შესახებ შეთანხმების მოქმედების შეჩერების შესახებ დადგენილების პროექტი შეიმუშავა. რუსული მედიისვე ცნობით, ინფორმაციაში აღნიშნულია, რომ 18 ივლისს საქართველოს პარლამენტმა მოახდინა ევროკავშირთან ასოცირების შეთანხმების რატიფიცირება. ამ შეთანხმების უმეტესი პუნქტი, მათ შორის, ღრმა და ყოვლისმომცველი თავისუფალი ვაჭრობის შესახებ ძალაში 1-ელი სექტემბრიდან შედის. როგორც რუსეთის ეკონომიკის სამინისტროს პროექტშია აღნიშნული, ხელშეკრულების მოქმედების შეჩერება შეთანხმებულია რუსეთის საგარეო საქმეთა სამინისტროსთან, ეკონომიკის განვითარებისა და იუსტიციის სამინისტროებთან. შეგახსენებთ, რომ საქართველოსა და რუსეთს შორის თავისუფალი ვაჭრობის შეთანხმებას ხელი 1994 წლის 3 თებერვალს მოეწერა.