რუსეთის მხრიდან თავისუფალი ვაჭრობის ხელშეკრულების შეჩერების შემდეგ, რუსეთ-საქართველოს შორის სავაჭრო ბრუნვის შემცირდება, - აცხადებს სააგენტო "ჯი-ეიჩ-ენთან" საუბარში ექსპერტი ექკონომიკის საკითხებში ირაკლი ლექვინაძე. მისი თქმით, ევროკავშირთან ღრმა და ყოვლისმომცველი ხელშეკრულების გაფორმების შემდგომ, ქართველი მეწარმეები ემბარგოს მოლოდინშიც კი იყვნენ.
„თავისუფალი ვაჭრობის შეზღუდვა ნიშნავს, რომ რუსეთში საქართველოდან შეტანილ პროდუქციაზე იმოქმედებს საბაჟო რეჟიმი, იმის მსგავსი, რომელიც მოქმედებს იმ ქვეყნებთან, რომლებთანაც რუსეთს თავისუფალი ვაჭრობის შესახებ ხელშეკრულებები არ აქვს გაფორმებული. ეს არ არის ემბარგო, მაგრამ არის პირობების გაუარესება ამ ორი ქვეყნის სავაჭრო ურთიერთობებს შორის. ჩვენ რუსეთისთვის არ დაგვიწესებია და ჩვენ არ ვართ ამ ცვლილების ინიციატორები. რუსეთიდან შემოტანილ პროდუქციაზე იგივე რეჟიმი იმოქმედებს. საქართველოდან შეტანილი პროდუქტები რუსეთის ბაზარზე შეტანისას თუ შეღავათიანი ტარიფებით სარგებლობდა, ამის შემდეგ მოექცევიან ჩვეულებრივ დაბეგვრის რეჟიმში. ეს იმას ნიშნავს, რომ რუსეთის ბაზარზე ეს პროდუქტები გაძვირდება. ეს კი ქართველი მეწარმეებისათვის გარკვეულწილად პრობლემაა და სავაჭრო ურთიერთობების შეზღუდვა და შემცირებაც შესაძლოა გამოიწვიოს. ამაში ახალი არაფერი ყოფილა. ქართველი მეწარმეები რუსეთის მხრიდან ამაზე უარესსაც კი ელოდნენ. ევროკავშირთან ღრმა და ყოვლისმომცველი ხელშეკრულების გაფორმების შემდეგ იყო მოლოდინიც, რომ რუსეთს შესაძლოა ემბარგოც კი გამოეცხადებინა. ხვალ პროცესი შესაძლოა ემბარგოშიც გადაიზარდოს, თუ კი რუსეთის მხრიდან ეს ეტაპობრივი სანქცია იქნება",- აცხადებს "ჯი-ეიჩ-ენთან" საუბარში ირაკლი ლექვინაძე.
ექსპერტის აზრით, თუ კი წლების წინ რუსეთ-საქართველოს შორის გაფორმებული ხელშეკრულება გაუქმდება, მაშინ დაბეგვრის რეჟიმი იქნება ისეთი, როგორიც საქართველოს იმ ქვეყნებთან გააჩნია, რომლებთანაც ანალოგიური ხელშეკრულება არ გვაქვს გაფორმებული.
ექსპერტი მიიჩნევს, რომ რუსეთისგან განსხვავებით, საქართველოს მთავრობამ ხელშეკრულებას არ უნდა გადახედოს, მით უმეტეს, რომ რუსეთის ქმედება საქართველოს ეკონომიკისთვის დიდი ზიანის მომტანი ვერ იქნება.
რუსეთი საქართველოსთან თავისუფალი ვაჭრობის შეთანხმებას აჩერებს. როგორც რუსული საინფორმაციო სააგენტო „რია ნოვოსტის" მიერ გავრცელებულ ინფორმაციაშია აღნიშნული, რუსეთის ეკონომიკის სამინისტრომ უკვე შეიმუშავა პროექტი, რომელის თანახმადაც საქართველოსა და რუსეთს შორის არსებული თავისუფალი ვაჭრობა შეჩერდება. როგორც სააგენტოს მიერ გავრცელებულ ინფორმაციაშია განმარტებული, 18 ივლისს საქართველოს პარლამენტმა ევროკავშირთან ასოცირების შეთანხმების რატიფიცირება მოახდინა და ამ შეთანხმების უმეტესი პუნქტები, ძალაში 1 სექტემბრიდან შედის. გავრცელებული ინფორმაციით, საქართველოსთან თავისუფალი ვაჭრობის შეთანხმების შეჩერება შეთანხმებულია რუსეთის საგარეო, იუსტიციისა და ეკონომიკის სამინისტროებთან.